王贤志投资7位数蚀住拍同志真人骚首揭放弃TVB转投ViuTV播放之谜丨独家

2024-10-04 07:00

王贤志首揭放弃TVB安排ViuTV播放之谜投资7位数再拍同志真人骚《Boyscation Too》丨独家

继2022年制作香港电视史上首个男男配对真人骚节目《仔仔一堂》后，王贤志（Vinci）投资几百万再制作《Boyscation Too》，播放平台由TVB转到ViuTV。Vinci讲得坦白，新合作关系好开心，可以话晒事，最开心可以圆梦，预咗蚀做都冇所谓。而他亲自拣选的参加者个个高质，最突破是成功从网上搵到来自广州的20岁美术系大学生。采访：杜杜摄影：朱伟彦

Vinci花了大半年制作《Boyscation Too》，虽然大压力，「但我话事，好有满足感，大家锺意或欣赏系最大回报。」

Vinci表示《仔仔》反应不俗，将《Boys》转到ViuTV播是想开拓不同层面观众，「上次TVB播回响好好，但喺同一个地方再播同类型节目，都系嗰班观众，feedback差唔多，不如喺ViuTV播。」最重要是Vinci想「集齐一套」，「喺呢个圈咁多年做过晒咁多传媒，亚视、有线、Now观星台，3间电台，系Viu未做过，如果Viu有自己节目又几好喎！」

2022年《仔仔一堂》推出时，引起不少回响。

节目在峇里取景，参加者通过各项游戏进行配对。

节目中，参加者有不少亲密举动。

自己投资自由度更大

Vinci经熟人穿针引线跟ViuTV合作，今次由他全力投资，「系几百万以上，我哋budget好大，10个仔加我，再加梳头化妆，已经10几人，仲有幕后制作、写稿、导演、摄影师，成40几人去峇里，留咗6日，机票酒店仲有食，拍嘢又有好多开支，好似放场烟花，为咗节目好冇办法。」他坦言很喜欢这个合作模式，因为话事权多了，投入程度更大，「合作模式好特别，可以话电视史上未试过，上次系外判节目，资源系TVB，制作完几时出，最后delay咗1年先播亦唔到我决定，因为版权系佢。」但今次不同，作品属于Vinci，「Viu只系播放平台，海外平台都自己去倾，版权都系我嘅。」他认为这个模式有机会成为未来趋势，「外国好早已有，等如艺人唔系永远1间电视台，跟唔同电视台合作都得。」

每位参加者都由王贤志亲自邀请。

Vinci提醒观众要珍惜这次机会，「搞一辑节目好难，要好多backup、资源，香港有几大，我搵一转起码100个人，有好多人推咗我。」他又坦认花7位数制作冇谂过回本，「就咁喺电视播唔会回到本，我唔系为赚钱，所以我系癫㗎，冇人会做件咁嘅事，我系攞嚟发梦㗎咋！」他认为卖埠回本的机会亦不高，「𠵱家个时势，点回本啫！吊高嚟卖又冇意思，希望多啲人欣赏到节目，多啲正面回应，希望个节目受欢迎，有啲后续，搵返少少帮补。」

四个参加者因拍摄节目变得老友鬼鬼。

网上搵到广州参加者

Vinci坚持制作这节目纯为圆梦，「30年前读完书返嚟入电视台，新人做起，好惊俾人知性取向影响工作，所有嘢好收埋，又唔锺意饮酒去蒲，点识人啫？！有好长时间冇拍拖，识嘅就系工作上嘅拍档，人哋未必系（基），嗰时又好想喺工作上拼搏，去啲监制房搵机会，隔咗咁多年自己做监制，搞个男男配对节目，其实系冲破晒我以前好多枷锁。」他笑言一班参赛者超幸福，若然有机会他都想参加，「我好想做佢哋罗，抛个身出嚟玩，每日最佳状态出现，有人帮你搞晒所有嘢，约咁多咁优秀嘅人畀佢哋认识，每日除咗瞓觉食饭，就系媾仔，喺边度搵咁好，仲可能因为有知名度，会有其他机会。」

20岁Kurt在广州是大学美术系4年级学生，童年好锺意苗侨伟，目前男神是张敬轩。

Tyler承认医生身份难公开性取向，现从事医美自由度较大。

Stone是专业调香师，因为疫情跟同性伴侣分歧渐大而离婚，希望未来另一半跟家人关系好。

冻肉店店长Kendrick，因为父母离婚令他10岁开始跟同性拍拖。

Vinci今季继续亲自搵参加者，更由熟人开始，「碌电话嘅phone list，觉得OK就搵，大部份2字头，最后生20岁，我全部生得出有找！」最年轻的参加者是自广州的Kurt，在IG发掘，「佢都有10几万followers，好红，见佢啲相几靓仔几得意咪follow，直至见佢啲story喺香港。」Vinci想到可以邀请他参加节目，于是约了Kurt食饭，「佢唔识我，有上网查我系乜水，知道真系有王贤志呢个人，佢再嚟香港已经系同我哋去峇里，都几神奇。」