专栏│上车落车 未到终站

暑假时间，除咗欧国杯同美洲杯进入最后阶段，而「我轰」车路士不知不觉间有好多动作，因为我哋换咗新教练马列斯卡。

先睇上车嘅部分，其实已经有艾达拉比奥约同达斯贝利贺尔等5人上咗呢架伦敦大巴士，可能有部分名字大家都唔认识，而小弟对马克古奥、连拿度维加、奥马利基利文都系加盟后才会有深入少少认识，呢架巴士永远唔能够令人有信心可以向前，我唔系话要睇死架车，或者我哋终于搵到一个一鸣惊人嘅好司机，眼光独到。

但我睇落，领队话要搵个多位置都踢到嘅球员，而呢5个先唔好讲位置，级数都令人担心，除咗3,000万镑嘅达斯贝利贺尔，上季系马列斯卡治下李斯特城嘅核心，再加上表现真系好，仲有机会一拍即合，其馀4位真系要再借出去浸吓。

有人上车就总有人落车，唔系架巴士真系满座行唔郁喇，当中包括伊恩马迪臣、利维斯贺尔、奥马利赫捷臣、薛耶治同堤亚高施华，薛耶治而家先正式宣布离队其实几搞笑，堤亚高施华对中坚影响性极大，始终唔可以留队指导一班新晋中坚，后防线几令人担心，至于赫捷臣，如果大家仲记得，佢系阿仙奴过嚟嘅青训，最尾卖咗俾今季升班嘅叶士域治，佢今年系英冠表现系好出色，2300万镑绝对抵放，而贺尔同马迪臣都系有上阵过车路士嘅青训，两个嘅能力其实都系对于一队嚟讲差少少，适逢有球队需要其实放都无可厚非嘅。

上车落车，仲有排演，即管睇吓车路士嚟紧又有咩大收购，或者系大出血。Willhappy