恒大债赢粒糖输间厂｜曾智华

上周退休老友傻强喊咁口搵我呻：「碌sir惨呀，走晒大鸡呀，比特币又狂升，逼近7万美元啦，我早想瞓身㗎喇，追唔追呢？点睇呀？」

退休者「有放过、冇杀错」

小弟对退休者的再三忠告：「一定要保住老本，因此乃你安安稳稳行完人生路所依靠的。切勿多手、贪心去买一啲Too Good To Be True的投资产品。尤其你唔知点解佢咁「正」，又或者究竟乜葫芦卖乜药的，一概弹开。有放过冇杀错！放过绝冇问题，肯定无损失，相反，一旦买错，分分钟搞到棺材本都冇埋，咁就晚年徒悲伤嘞！」

贪心，乃人的天性，无论几叻几巴闭者，都可能中招。讲个真人真事畀大家知，一个我认识嘅人的故事。M哥为著名CEO，专业内叻到飞起，早早被大老板赏识，不停加人工兼派花红，四十岁晋身五千万富翁行列。

「稳赚」8厘 贪字得个贫

某次晚饭佢意气风发讲：「阿碌如今我投资，只集中一种，每年稳赚8厘息，冇风险！不过必须要最少有五球（500万）先得。你呢类公务员，冇得玩㗎喇！」

500万对于中层公务员来说银码太大，兼且先父教落——便宜莫贪。银行定期只得1厘息，「稳健投资」会有8厘？肯定魔鬼在背后！

不过M哥真的一帆风顺，呢种「8厘息投资」，不只系佢，越来越多全城大富豪参与，变成潮流，人人赚到笑呵呵，咁笋去边处搵？

发展下去M哥好快成亿万富豪，不停买物业，也因2006至2016年间楼价倍升，水涨船高，最辉煌时有5亿几身家。

佢睇睇大形势，息口咁低，「稳赚投资」则年息8厘，你话最精明做法系点？正是向银行以2厘至3厘息低息借贷，攞去赚8厘息的投资！一来一回有5厘咁好利润，一亿就年息500多万、3亿就1,600万，真系打跛脚都有排叹，使乜打工咁戆居呢？

讲到呢度，大家都应知小弟讲紧乜。正是M哥由几百万到几千万再到五亿，将身家性命财产加借尽，瞓晒落恒大债券！

点解以佢咁叻咁精明，都会认为一个Too Good To Be True的「投资局」是又真又可以永恒，故从不懂收手呢？一个字讲完——贪！多少人就此葬身？

资深传媒人 曾智华

---
《星岛申诉王》将推出全新项目「区区有申诉」，并增设「我要赞佢」栏目，现诚邀市民投稿赞扬身边好人好事，共建更有爱社区。立即「我要赞佢」︰https://bit.ly/3uJ3yyF

想睇更多精彩内容，请立即浏览「区区有申诉」活动专页：https://bit.ly/41hgS9E

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ