古天后日志｜港股再次向上挑战50日线 惟17400不容再失

11月14日，大致多云，早晚清凉，下午部份时间有阳光，天气乾燥。隔夜美股喺最新通胀数据公布之前个别发展，道指反覆靠稳升54点；标指跟纳指分别微跌3点及30点。今晚美国会出CPI，呢个数据较为重要，对未来息口去向有较大启示。从之前嘅数据去睇，估计未来数月CPI会再度回落，主要系油价向下，并未有因为以巴战争爆上，二来喺房租房价持续向下。估计今晚CPI回落大约3.3%，当全年CPI迈向3%，美联储局其实无乜藉口再加息。核心CPI较受联储局睇重，本身扣除油价影响，房租影响力更大，估计同比增长4.2%，环比持平，呢个情况下，淡友仍然有借口去做淡，不过长远呢个指数都系向住3%嘅水平进发。虽然10年债息仍高企于4.6%，但未有进一步向上，似乎淡友已慢慢撤退，但喺债市就未见完全投降。

中港股呢边快踏入业绩期，睇返已公布业绩嘅部份A股，大多数表现唔算差，但股价表现偏弱，主要系场多资金面薄弱，就算交出一份靓业绩，亦未见资金入场买货，结果散户见业绩后唔升就掟货，结果股价就向下插，呢个系目前中港股市最大困局。并业绩好与坏并未能影响股价升跌，反而系缸水问题主导走势。场内机会不多，中港股市若要回升，首先系解决资金问题，业绩仲系其次。

双11旺丁唔旺财 业绩公布见真章

个别板块营收增长大，但盈利反而倒退，呢个情况喺电商平台最为明显，拼多多、京东（9618）、阿里（9988）嘅淘宝，竞争大要靠补贴作战，例如京东、拼多多就用咗成百亿去补贴大战。经过双十一购物节。各大电商如去年未有公布销售额，销售成绩系旺丁唔旺财，大家心中有数，到业绩公布自然见真章。反观美股，即使估值偏高，业绩出来增长亦唔算强劲，但美企股价就算有回吐。两三下就拉升行返上去，呢个明显系场内资金多少嘅分别。

中国债务问题严重，内房债已率先爆雷，阿爷唔希望内地银行出现太量坏帐，关乎国家体面问题，唔少银行将呆帐打包，再转售予国企，试图压低坏帐拨备，数目喺数百亿元之间，但相对估计逾万亿坏帐，呢个方法都只系治标唔治本，杯水车薪，不过可以睇得出阿爷心态上，系想用个拖字，以时间去消化个问题。

港股噚日成交额只有750亿，但全日波幅330点或1.9%，资金面虽薄弱，但波幅超过300点，市场仍然有人炒落。恒指寻日先跌后升，终止上周连续4个交易日跌势，低位17,126点刚好守住上月低位延伸至今嘅上升轨底部，尾市发力倒升逾200点收17,426点，重越20日线。夜期升势延续，预期今早恒指高开升穿17,500关，但要企得稳方有力再向上挑战50日线17,700点关，即市回吐支持为10日线及50日线附近，约17,400点至17,450点，后市要上，此关不容再失。

相关文章：

港股市况｜美今公布通胀数据 恒指高开68点 理想首款电动车快亮相 股价升4%

---
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ