星8卦｜「家姐」卖楼倒贴嫁「老粗」望夫成龙欠落一身债

2023-10-31 11:00

唔知系咪到咁上下年纪，女人就特别想嫁？好似「家姐」同「倒及」呢对金兰姊妹，因为两个都拍过啲肉感戏，知道自己好难搵到好人家，于是一齐跟大师日拜夜拜，希望搵到好老公。几乎喺同一时间两姊妹都搵到，「倒及」嗰位白手兴家，平平实实，娶咗佢之后生意蒸蒸日上。

「家姐」呢位门面好好睇，远嫁外国，大家梗系唔知咁多底蕴，其实佢个男人根本无钱，但见姊妹都有着落，呢个「老粗」之前一直系追开女明星，最重要唔嫌自己嘅出身，毕竟当年为生活都博到好尽。「家姐」卖晒香港家当带住近9位数嘅身家，希望喺嗰边帮老公创业。「老粗」有乜所谓啫，之前追嗰啲到咁上下就知佢乜料自动行开，见有人唔识死，仲带埋钱嚟嫁，即刻带佢返家乡威威。

「家姐」头几年真系好威猛，买靓屋搞大生意，仲定时叫媒体报道，但「老粗」根本成唔到大器，最终将佢副身家清袋不特止，仲黑仔到有个项目烂尾，搞到而家孭住一身债，「老粗」都有埋怨「家姐」，太想出名争气，又唔计吓自己系普通人，搞投资一定唔够商人阴险，呢笔债之大，连「倒及」都唔肯再借钱畀佢哋，如果真系破产，「家姐」一定顶唔顺！