古天后日志｜港股又见大股东搵笨资金撤离后唔再落搭

2023-09-22 11:27

9月22日，美国最新失业救济人数回落，加上环球债息回升，加息预期再度升温，VIX升破17水平，美股三大指数显著下跌，道指跌370点；标指跟纳指分别跌72点及245点。科技股沽压沉重，ARM（美︰ARM）上市先升后跌，更跌破招股价，AI热潮似乎已告一段落，今年股王英伟达Navidia（美︰NVDA）都顶唔顺，回落至410美元水平，留意跌穿400美元，跌幅或进一步扩大。

美元保持强劲，人仔自然易跌难升，目前于7.3水平左右徘徊，中概股向下，隔晚港股喺夜期跌穿17,600点水平，噚日A股亦全线下跌，成交只有5,790亿元，明显系外资走咗唔返转头，港股情况一样差，噚日再跌230点，成交774亿元，莫过话成交难以重返千亿元之数，依越玩越缩，就连每日成交额要超过800亿都吃力。

中港股市表现咁差，外资一去不返，主要系外资认为政策风险难以计算，加上公司管理风险溢价亦太高，内地企业唔会先考虑股东利益，更甚系利用自己职权炒股赚取过人利益，港股情况亦相近，大股东利用财技搵小股东笨，外资自然唔会再落搭，就连散户亦死心，资金离场，成交萎缩，令到中港股市进入长期有波幅，冇波幅嘅情况。

啱啱就出现咗一个好明显大股东搵小股东笨嘅情况，鲁大师（3601）由于持有超过5亿元现金，上周公司出通告表示，有意本周开董事局商议派发特别股息一事，消息一出，股价两日间由1.1元弹上1.94元，听落公司有钱派息好合理，股价炒上亦系自然不过嘅事。但喺会议举行前，公司主席田野，突然喺高位大手沽售3,434万股，令其持股量由30.76%急降至17.99%，引发股价大跌，更跌破炒上前低位。最离谱嘅系，公司噚晚再发通告，表示更取消会议，即系唔再就派发特别股息进行商议。公司摆明系借出消息炒高股图利，小股民见之前嘅利好消息追货，全部做晒韭菜。呢啲例子多不胜数，一个咁嘅市场，叫资金仲点会放心入场。