专栏│女狂牛难望再刷好运卡
2023-08-20 08:00 
女子世界杯不知不觉已经嚟到决赛，「女狂牛」西班牙会硬撼「女三狮」英格兰。
讲搓波组织，西班牙的确技高一筹。不过，艾尔之前道出过球队体能消耗嘅问题，上场对瑞典「旧病复发」。
「女狂牛」81分钟千辛万苦领先一球后，再次抵受唔住对手突然加强嘅压逼，同埋阵式上嘅转变，7分钟后就被追和。唔系队长卡芒娜补时挺身而出，喺禁区外远射得手，分分钟要打到加时甚至互射12码，先分到胜负。西班牙上场嘅缺点无乜改善到，赢波有一定幸运成分，呢张「好运卡」真系可以擦到最后？艾尔不敢苟同喇。
佢哋今场嘅对手英格兰晋级过程都唔算轻松，但今届「女三狮」喺领队域雯嘅调整后，真系有进步。以往英格兰打开4后衞阵式，今届世界杯转打3中坚阵式，进一步解放翼卫邦朗丝同瑞秋戴莉嘅边路进攻能力。一对箭头萝伦希普同萝素嘅配合越嚟越好，尤其萝伦汉普状态逐步提升，加埋萝伦占士停赛后复出，英格兰多返进攻点，对西班牙有一定威胁。
两队都系第一次杀入决赛，呢场相信会系一场几紧凑嘅终局之战。不过，艾尔相信域雯嘅执教功力，可以为英格兰攞到第一个世界杯冠军。艾尔
-----
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应