独家丨黄秋生自认厚颜出自传:演员仔有咩咁巴闭 赞游学修肯做有谂头可捞埋广告

黄秋生担任艺术总监的「神戏剧团」十周年，庆祝活动包括秋生跟游学修首度合演舞台剧《极地谜情》，入行41年的秋生亦会推出首本自传《秋生回忆》，当事人笑言是厚颜无耻之举，以及举行剧团摄影展览顺道为自传举行签名会。本年度财政预算案，政府将注资5亿元支持香港创意产业，鼓励更多跨界别合作，秋生就笑言，「每个界别都未做得好，跨乜嘢界别先得㗎。」采访：杜杜 摄影：罗安强 发型:Taky Chung(秋生)、Ray Mork(阿修)@AdmiX Hair Styling 化妆: Jolinn Ng(秋生)、Julie.H @JLAB(阿修) 服装:YOHJI YAMAMOTO HOMME(秋生)、NEEDLES、EXI.T(阿修)@ithk 场地:柏斯音乐

秋生和阿修早前为9月演出的舞台剧《极地谜情》拍摄海报。

秋生和阿修虽然初次合作，但两人一拍即合非常夹，睇佢两个笑得几真挚。

秋生搵阿修合作源于去年一次饭局觉得好啱倾，而选择改编法国编剧Éric-Emmanuel Schmitt作品《Enigma Variations》，除适合两人演出外，还因秋生在2012年跟梁祖尧合演过（当时译作《极地情圣》），「冇乜几多剧系两个人做，嗰时做得唔系好满意可以再做。」阿修直言近年演出机会唔多，难得跟前辈合作开心到震，「开头都未知个戏由头到尾净系得两个人演，知道更兴奋，所以即刻应承。」

去年秋生和阿修饭聚，促成今次合演舞台剧机会。

2012年秋生跟梁祖尧演过《极地情圣》，相同剧目今次改为《极地谜情》。

阿修坦认演戏机会少，上次演舞台剧《我们最快乐》已是去年的事。

秋生称未够班出自传

去年秋生在台湾书展推出小说《黎根的天台》，今年的香港书展就有《秋生回忆》，秋生认为戏剧界泰斗锺景辉或者桃李满门的毛俊辉才够资格出自传，只是剧团行政总监张佩华提议才勉强应承，「我边有资格啫！一个演员仔，牙擦擦，好多人都有好多故仔，我觉得冇咩咁巴闭罗！做咩整本书煞有介事咁，阿茂又出一本阿寿又出一本，何东嗰啲帮佢写一本就值得，我呢啲算系咩？！既然都做咗，就厚颜无耻做埋落去！」

《秋生回忆》冇用靓相做封面，秋生觉得以画代相一样靓。

今次出书秋生搵人代笔，若有机会再出会亲自写，而为配合自传秋生搵返大批旧相，但认为若再睇返剪报会有更多回忆，「睇返啲剪报就会记得几时闹过啲咩人！又俾边个闹过呀！闹啲咩，我又发啲咩神经呀！」因首次举行签名会，秋生最唔希望遇到癫人，怕自己识功夫出手太重，「我揼咗你我都唔觉，唔系兜斗巴星咁简单，打落去就截脉㗎，即刻冇血到，所以千祈唔好，我怕呀！」至于会否有热情粉丝埋身会否？「我又唔系镜，又唔系灯，又唔系门，唔会啦！我都想有。」

秋生讲起若遇癫人闯签名会，怕自己识功夫出手太重，阿修笑唔停。

相士批秋生桃李满门

叫秋生及阿修为对方构思一个新的工作方向，前者认为阿修做广告会好成功，「佢有谂头嘛！有触觉又肯做，可惜𠵱家香港啲广告死得七七八八！」阿修表示主理网台《试当真》都要度广告，但绝对唔易做，「我做广告应该会好躁！」挑通眼眉的秋生完全明白，「个客呢个一句嗰个又一句，你要乜人哋咪做畀你！你又话唔系咁唔系咁，你自己做嘞！」阿修狂点头，「所以我咪会好躁罗！」

近年秋生不停举办大师班，好多圈中人都是他的学生。

阿修就觉得秋生最啱做老师，秋生即抢答：「咁就瓜得啦！」阿修解释：「有啲人就算几叻，但唔识教人，但系佢会知道你差啲乜，再表达畀你听，同埋佢主张唔好懒深奥，会用一啲简单嘅方式去讲。」因为彩排阿修先发现秋生这个优点，「佢会好多分享，譬如角色研究方面，戏剧世界好多嘢神化咗，而秋生哥主张唔使咁神化，作为老师，佢教嘢应该会好叻。」近年keep住开戏剧班的秋生笑言都是时候转行开学校，「以前批命嗰啲都话我最后系做老师，桃李满门㗎！哈哈！搵吓钱，冇钱啦！」

阿修之前到日本旅行，每朝睇电视广告都大赞好睇过香港。

阿修赞政府创意计划

政府自2009年推出「创意智优计划」，截至2022年9月底已拨出近23亿元，资助创意业界在本港和外地举办约650个项目，约1300家中小企受惠，创造近3万个职位和超过8万个培育机会。早前公布的《2023-2024财政预算案》，政府将计划注资5亿元落「创意智优计划」，支持香港创意产业的发展，鼓励更多具创意及文化底蕴的跨界别、跨领域合作项目，提升香港流行文化的影响力。

秋生大叹香港愈来愈少创意，连海报设计亦冇新意。

问两人对此有何意见？秋生认为要跨界别合作，首先要每个界别都做好先，「每个界别都未做得好，跨乜嘢界别先得㗎！同埋舞蹈界同文学界合作，一路都做紧㗎啦，我哋表演同文学界嘅合作咪剧本罗！舞蹈就同音乐罗，不嬲都做紧㗎！出嚟讲嗰个唔识罗！」而阿修就话唔明白有关计划，所以畀唔到意见，但笑言：「佢哋做得嘅嘢一定系好嘢嚟，佢哋加油！」

《星岛头条》新网站有更多精彩内容：http://www.stheadline.com/