独家丨陈湛文演《废J》有共鸣穷到冇得拣嘢做 袁澧林获提名后终有人听意见
2023-02-06 07:00 
陈湛文（Peter）袁澧林（Angela）首度在ViuTV新剧《杀手废J》合作，无胆杀手「废J」遇上文青女神咖啡店长「曾汶清」，整定连做兵都冇资格。 Peter承认同「废J」几似，同样是生活迫人冇得拣工作，更期望角色被拿来跟周星驰比较，明知输都光荣；而凭电影《窄路微尘》获多项提名的Angela，就自爆最大分别是现在讲意见，终于其他人肯认真听。采访：杜杜 摄影：Stanley 形象:Daniel Cheung(Angela) 发型: Oscar Ngan@Orient 4(Angela) 化妆:Jenny Shih(Angela) 服装:eye’s Buddy feat. VEDI、VERO、Demic_hk、Liberation_hk、New Balance(Peter)
初次跟格仔导演Mike（刘诺衡）及编剧麦可晖为首的「无制限OT编集団」合作，Peter和Angela早于试镜时已劲兴奋。Peter说：「我对个casting已经好期待，可能我哋两个都有睇Mike导以前啲综艺节目，都觉得呢个人几有趣，锺意帮自己打格仔又盛，哈哈！佢系有啲癫癫哋，会令我想认识呢个新一代嘅创作人，癫喺边方面。」而Angela收到试镜两场剧本，已过足戏瘾，「虽然唔知成个故事讲乜，但系净系睇呢两场觉得好似周星驰嗰啲喜剧嘅感觉，嗰种无厘头呀、寸呀，我个角色某啲位会用啲好古怪嘅方法做开场白，所以我casting时好过瘾，阿晖同返我对戏，佢写嘢非常厉害，剧本出乎意料哋系职业编剧嘅水准嚟。」
「废J」连做兵都冇资格
「废Ｊ」之所以废，除了无胆，仲明明生活环境唔多好，依然坚持拣嘢做，Peter都觉得这个设定够搞嘢，「佢系既有得拣亦系冇得拣，就算几冇饭食都觉得自己系有得拣嘅，但系佢冇得拣嘅原因，正正因为佢冇饭开。」他话好明白角色，因同自己好近，但Angela竟然唔信问；「你会唔会呀？！《饭戏攻心》总票房第2嘅电影男星都话冇得拣，咁点算呀？！你分享多啲，系艺术上面选择冇得拣？」Peter就解释是生活上冇得拣，「我冇试过烂尾工作，我只系试过低budget啫！我听我啲同业佢试过啲烂尾工作，咁咪好近罗！呢啲真系冇得呃，就好似你《窄路微尘》都系咁为咗个女先去做，系咪先？！」
Peter和Angela首次合作觉得未够喉，因「废J」只是自行性幻想，同女神对手戏唔多，Peter笑言：「摆明系兵嚟，纯FF，仲要FF完，以为自己做咗个好好嘅兵，应该系兵都不如，《沦落人》嗰款都冇呀，哈哈！可能系，『咦！掉垃圾呀？系呀！走先 bye bye』 嗰种嚟，严格嚟讲系重感情线嘅，但系佢未必见得到嗰啲。」
望可以同星爷比较
Peter第一次孭飞做剧集男主角，他就借用早前首次孭飞剧集《大诚实家》蔡瀚亿（BabyJohn）接受《头条日报》访问时答案，「佢好似又讲咗我嘅心声，我又系冇乜压力，我哋已经完成咗嗰个阶段嘅任务，嚟紧就要睇佢出街后观众反应，呢套嘢系几独特，呢种独特有几多人锺意，唔系我哋去主宰，随缘啦！」问到会否叫老婆留意鼻鼾，来测试有冇压力呢？他就搞笑话：「扯唔扯鼻鼾系完全睇我哋凑阿女凑得几攰，哈哈！睇佢玩得我几甘嘅啫！」
对于《IT狗》、《饭戏攻心》和「废J」都是演毒Ｌ，Peter坦承都不明白为何制作人都爱搵他这类角色，Angela就认为，「你演戏演得好罗！你饰演摺、毒好，你能力嚟嘅。」讲到「废J」同周星驰《国产凌凌漆》中角色几类似，Peter就欢迎拿来比较，「如果系就好呀，如果可以同星爷同level秤，秤吖！我输10万丈远都冇问题。」Peter仲打算在星爷社交平台留言，「我前排有个image真系要扮佢，出咗之后我再DM佢，佢可能会话后生仔唔好再步我后尘，自己创新啦！」
视《废Ｊ》为考牌作
对于《饭戏》票房已荣登香港史上华语片第2位，身为主演之一的Peter，就觉得心态上没转变，因他自觉是掹车边，「我唔会觉得系我担到嗰个票房，会视之为子华神担到个票房，我坐咗个顺风车，纯粹系太多人爱载子华哥，所以先会咁犀利。」反而《废Ｊ》才算他的考牌作，所以特别期待睇。
凭《窄路微尘》先后获金马奖和电影评论学会提名的Angela，最开心听到大量赞赏声，「呢几个月得到前所未有，或者成世以嚟畀人称赞嘅总和，我谂同大家对我嘅期望低有关，我成世喺能力上都冇畀人赞过咁多次，通常赞个头好细，对眼好大，都几开心。」当中前辈黄秋生的称赞，更令她兴奋，「我喺金马奖撞到佢，当刻冇机会直接倾偈，完咗喺酒会，佢就抛下两句，好嘢之类，再话『有睇你啲嘢㗎』哗！开心到飞起，秋生哥原来喺啲学校分享度话有留意我呢个演员，劲开心！」她就坦承提名后，连其他人的态度都有转变，「提名后有啲嘢系方便咗，例如我分享一啲Artistic feel时，大家会认真啲去看待，一年前讲嘅嘢一样，好似有返一啲重量咁，所以下个project我会尝试表达多啲。」
新网站 www.stheadline.com 已推出
最新回应