初选案︱何桂蓝理解「揽炒」是要令政权失去管治

「35+」初选案续审，被告何桂蓝今午于西九龙法院作供解释「揽炒」，「首先我会话揽炒唔系一个目的」，续指「揽炒系一种精神，就系明知自己会承受好大代价，简单来讲即系炒埋自己，都要坚持做自己认为应该做嘅嘢。可能你会问，啖对家炒咗啲咩呢？佢失去咗对我哋嘅控制，亦都冇办法再控制对香港事态嘅」。何桂蓝另指「反抗嘅同时必然会建立一啲嘢⋯⋯你会打开咗好多空间，呢啲先系运动真正嘅建树」。

大律师Trevor Beel主问下，何桂蓝解释「揽炒」定义由一开始已经人言人殊，「可以有完全唔同嘅意思」，字眼最初源于连登论坛，意指「香港政府、警察一啲不义行为要传达畀国际社会知道，从而令到中国唔可以维持香港一切正常嘅假象」。何桂蓝认为「首先我会话揽炒唔系一个目的」，因为无法就「揽炒」目标达成共识，续指「揽炒系一种精神，就系明知自己会承受好大代价，简单来讲即系炒埋自己，都要坚持做自己认为应该做嘅嘢。可能你会问，啖对家炒咗啲咩呢？佢失去咗对我哋嘅控制，亦都冇办法再控制对香港事态嘅发展」，「对家」意指北京及港府。

何桂蓝又指「反抗嘅同时必然会建立一啲嘢，而我哋透过反抗所建立嘅嘢必然会导致佢嘅权力会有所削弱，至于每一个人做嘅嘢系咩呢，就每一个人都唔同喇，所以我认为保持个开放性系比较好喇」。何桂蓝续解释「即系大家觉得社会运动有一个好明确嘅诉求，达到就达到，达唔到就输喇。但系喺唔同嘅时空其实真系好少社会运动达到佢哋原初嘅诉求，但系喺运动嘅过程里面，你会打开咗好多空间，呢啲先系运动真正嘅建树」。

Trevor Beel问到其是否同意「揽炒十步」，何桂蓝坦言「我认为策略投票成功，民主派选到35席或以上，系非常难，直情系奇迹，但唔系无可能嘅」，「即使功能组别几难选都好，2019嗰个民气的确我觉得可以支撑多几席。简单嚟讲，2019年嘅运动好可能突破到本身立法会组成上嘅限制，即使有功能组别，即使行比例代表制，民主派都可以选得赢。」但何桂蓝认为出于前述原因「我唔认为35+可以维持到⋯⋯我想讲由第二步开始，我已经系觉得唔可能㗎喇，所以以下嘅都系推演」。何桂蓝又称「但系最后我哋大家都被现实打败啦，我觉得冇可能，但系最后第8步呢篇文两个礼拜之后就来咗喇。」李官问「揽炒十步」是否不切实际，何桂蓝认为「如果中共系容许香港人民选嘅议员、民主派，喺议会取得超过35席嘅话，就唔需要有功能组别，亦唔需要有分组点票。」

Trevor Beel引述2020年3月25日谭耀宗专访文章，何桂蓝忆述「呢篇文好爆嘅当时⋯⋯因为大家都觉得，呢次系香港第1次表态就系如果你试过半呢，佢哋就开始DQ人喇⋯⋯所以当时呢篇文一出，大家就话DQ啦DQ啦」。何桂蓝解释指，大家有见2019年的情况，已经设想2020年立法会选举能否过半，2020年1、2月时大众争论主要在立会过半后开始抗议，还是留待2021年特首选委选举后，视乎能否过半而定，因为这更迎合到运动中不少人希望特首下台的想法，而大众尚未讨论立会过半后有何行动包括是否否决财案」。何桂蓝直言，「除非你攞到地区直选同功能组别都过半，否则制度上你系影响唔到政府嘅任何决策，最多就系否决佢㗎啫」。

《香港国安法》指定法官李运腾追问下何桂蓝以观塘音乐喷泉为例，解释当时项目引起巨大反对声音，「连建制派都投唔落，一度否决过」，但当时财委会议员也只能提出意见，「佢哋冇办法制度上令政府将一个project由唔理想变做可接受」，最后政府略作更改后重推议案获通过，「啖结果大家都知，最后呢个音乐喷泉喺开幕之后几个钟内，啲system 就全部坏晒喇。回答返李运腾法官嘅问题，当政府要败事嘅时候，立法会都阻佢唔到。」

追问下，何桂蓝再补充「当政府倒行逆施，或者民主派议员见到系唔合理嘅时候，人民选出嚟嘅议员系应该要阻止到佢，呢样嘢叫做制衡，亦都系立法机关嘅存在意义之一」，何桂蓝认为当立法会过半时，理论上可以阻止政府推行政策，「但香港政府真系唔敢讲喇」。

何桂蓝再引述谭耀宗说，「即使反对派成功藉否决预算案迫使特首下台，特首任命权始终在中央手上，但他承认若由民主派控制议会，将直接冲击特区政府管治权，政府无法确保重要议案通过，行政主导无从谈起，对香港而言是严重宪政危机。」何桂蓝分析「谭耀宗佢背住全国人大常委嘅身份，佢将严重宪制危机定义为政府无法确保重要议案通过，都唔需要真系投票否决咗你，只要有否决嘅可能，谭耀宗就觉得系严重宪制危机⋯⋯ 我重申呢一句嘢只系讲紧个可能性啫，唔系讲紧实际行为，只要佢确保唔到佢要过嘅议案过到，对佢哋来讲就系宪制危机，啖你个宪制真系好有问题」。

Trevor Beel问到何桂蓝是否相信民主派有可能过半，何桂蓝指，「个问题唔系喺民主派会做啲乜，而系喺35呢个数字嗰度。佢答会唔会释法嘅时候佢冇答冇，佢只系话冇依据嘅时候唔会释法，即系有依据下会释啦。综合理解就系：如果民主派掂到35嗰条线，用DQ又好释法又好，北京呢个层面都会出手阻止。」

李官再问文中前文指向本土派而非民主派，何桂蓝反驳连许智峯、郭荣铿也曾被指为支持港独，「即是喺北京眼中大家都是港独派，不用分得那么细」，因为任何对政治、民主派稍有认识的人来说也无法理解许郭2人为港独派，「但系中央就经常都啖样讲，所以佢哋用得『暗独』呢个字，其实系包罗万有，指边个民主派都得」。

Trevor Beel引述戴耀廷文章〈真揽炒十步　这是香港宿命〉，何桂蓝坦承当时曾经读到，明言不同意「宿命」字眼，认为「宿命」意指「人系受一连串佢无法控制嘅因果所左右，但人自己永远可以成为第一个原因，生又好死又好，有时难免要退，但系唔可以避。如果按我头先嘅logic讲嘅话，香港嘅宿命可能会变澳门，或者系大陆嘅任何一个城市，因为呢个系专制政权嘅惯性。但系，反抗唔系必然。香港面对嘅历史局限，唔单止系束缚，亦都系香港之所以成为香港嘅条件，唔系话中共压落来，香港人就一定会反抗，反抗系香港人嘅选择，所以我认为用宿命来形容好唔啱嘅，呢个系一啲新嘅嘢」。

何桂蓝指，「简单来讲，我就系唔同意戴耀廷个tone讲到好似好宿命论啖啦，包括之后嗰10点，其实每一点都唔一定之后啖发生嘅，香港人嘅反应可能有唔同。虽然我话专制政权有自己惯性，但系加速要加速到有几快，中共有自己嘅能动性嘅」。

法庭记者：陈子豪

---

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ