独家丨李龙基叶振棠唔羡慕尹光变「AI歌手」被追捧鄙视AI歌冇价值：死实实有咩意思

2023-06-29 07:00

独家丨李龙基叶振棠鄙视AI歌冇价值：死实实有咩意思唔羡慕尹光变「AI歌手」被追捧

自爆面对细36年未婚妻Chris依然「有心有力」的72岁李龙基，最近宣布孖住79岁叶振棠(Johnny)于下月举行《双生双识演唱会2023》，更请埋91岁胡枫同76岁Joe Junior做嘉宾，夹埋318岁破开骚纪录。基哥和棠哥唱歌近半世纪，一向Sell靓声及好歌艺，对于近日尹光被网民以人工智能（AI）技术制作出「AI尹光」，并因翻唱姜涛及林家谦的歌而被年青人追捧，更成为本月之星获传媒疯狂报道，对此两人完全唔羡慕，仲狠批「AI歌」完全冇艺术价值，唔值得保留，更强调无论弹奏音乐或演唱，真感情相当重要。采访：杜杜摄影：朱伟彦

基哥和棠哥都认为AI完全冇得同人声比较，更极之抗拒变AI歌手。

基哥自爆仍有心有力，跟相差36年未婚妻Chris关系美满。

基哥跟棠哥相识接近50年，一向感情要好，音乐风格也相似，基哥表示两人都好有渊源，「我哋初初都系唱英文歌，我学英文歌就系听棠哥，嗰时知道有个人弹住Bass嚟唱歌好叻，好多人误会弹结他好简单之嘛，但弹结他同弹Bass完全唔同，弹结他揿住chord弹落去就系，但Bass要一粒粒音弹，一粒音错就好碍耳，所以弹住Bass唱歌难度好高，佢嗰时喺间好高级嘅酒店演出，我去听觉得好正，去得多倾吓偈，发现大家有相同嗜好，仲咁桥后尾同埋一间电视台，跟住又入同一间唱片公司。」基哥坦认跟偶像同台机会难得，「所以忽发奇想点解我哋唔搞一场演唱会，唱我哋自己锺意嘅歌。」

两人今次开Show，搵来偶像胡枫和Joe Junior做嘉宾。

基哥劲讨厌AI歌强调咪搞

讲到尹光被制成「AI尹光」翻唱林家谦《一人之境》及姜涛《Dear my Friend,》等歌曲成热话，基哥和棠哥都有留意，但就完全唔羡慕尹光因而成为网红。基哥更强硬表示：「我就绝对唔想，我觉得艺术呢样嘢，并非机器可以代替或者发挥得到，绝对唔可以，我听尹光讲佢自己都唔锺意，点解呢？真系冇感情，老实讲，首歌调子一样歌词一样，每个人唱出嚟都唔同，因为有每个人嘅发挥同特色，好似《忘尽心中情》畀我唱未必有咁嘅成绩，我唔及棠哥嘅声线。所以AI！No way，死实实嘅音响听嚟有咩意思啫！我一直觉得艺术嘅价值，就系有一直保留落去嘅价值，AI喎！边有保留价值？冇！所以千祈唔好搞我！」

「AI尹光」演绎的《一人之境》，「上架」3周已有92万点击，连轩仔都话每日瞓醒必听一次。

尹光在社交网回应「AI尹光」，表示自己无可取代。

棠哥亦好同意基哥，仲举例助证，「𠵱家灌唱片，电脑都可以做到嗰啲音乐声出嚟，但系唔同嘅，人弹出嚟先有感情，无错电脑可以做到结他声，但冇人弹嗰种感情。」基哥再补充，「讲返音响，𠵱家啲人听返胆机，其实个失真率高过原子粒机，但系点解啲人会听返?因为有少少瑕疵嘅嘢零舍好听，人始终系人唔会有100%好，但系好得意，就系锺意嗰啲唔系咁Perfect嘅嘢。」多年来唱惯Live Band伴奏演出的两人，更认为电脑合成音乐无得比，棠哥说：「演唱会一定要真人乐队，有时用MMO（Music Minus One即缺少主唱的音乐）系环境因素，焗住要用MMO唱，不过我哋以前啲MMO都系用真人弹奏。」基哥说：「真正弹钢琴、小提琴嗰啲，永远不衰，呢啲就系感情，呢啲就系艺术，艺术不可以代替。」

两人跟尹光好熟，知道对方亦不欣赏「AI尹光」。

基哥觉得用电脑合成的乐器弹奏好失真，完全没感情。

棠哥美加登台日瞓两个钟

疫后香港演唱会再度兴旺，基哥更踢爆棠哥刚冲出香港，到外地掘金，「啱啱Johnny叔叔喺美加走咗12场（骚），系辛苦啲。」棠哥坦认今次特别辛苦，「下次唔制，真系冇得瞓，因为每个骚都唔同地方唔同埠，有一个礼拜日日瞓得两个钟，做完骚宵完夜，瞓两粒钟就去机场，又要飞第二个埠，嗰晚又要唱，好辛苦，估唔到自己捱到，始终年纪大。」鬼马基哥再玩踢爆，「咩呀！佢一返嚟就买咗3层楼，下次去就6层楼！」棠哥没好气，以「3粒衫钮！」反驳打圆场。

棠哥刚由美加登台返港，连唱12场大呻辛苦。

棠哥解释演出排得密麻麻，全因要还骚债，「疫情之前我差嗰边3场，佢哋话依家可以返嚟做返喎！我话3年前畀我啲订使晒，帮我接多两场啦，点知同我接咗12场，我硬住头皮去做罗！其实我哋历年来都唔会做咁多美加，可能呢3年嗰边都冇得做，所以先可以走咁多个埠。」棠哥亦反爆基哥将于8中月到美加登台，但基哥笑言不能挑战棠哥场数，「我边有咁嘅能耐，知名度冇棠哥咁高，暂时3、4场，但我同棠哥一样会顶硬上，鬼叫我锺意唱，艺人就系咁奇怪，唔知点捱到，到嗰时就得。」