独家丨72岁李龙基自揭被第二春狼媾经过 最冧未婚妻炎夏陪放飞机
2023-02-16 08:00
本周二情人节,《头条日报》的一篇独家娱乐报道「72岁李龙基今年再婚低调唔摆酒 跟细36年女友性生活好协调」见街后被疯传,全港网媒齐follow,网民留言又Mean又有创意,连肥妈都躺著也中枪,「今次真系不要金不要银只要一碌棍??」、「皇上,保重龙体呀」、「玉皇大帝」、「72岁结婚都系想快啲屎」、「半年后可能会喺东张西望见到佢话比人呃晒啲钱乜都无晒好惨」、「无问题,到时咪好似肥妈咁开演唱会筹旗之后再玩过第二条女罗」、「女方的老豆(窦)真系惨」及「老人x嫰x,好过食炖鸡」等等,笑死人咩! 采访:方骞平
既然Part 1咁受欢迎,《星岛头条》记者即将Part 2「缘份好奇妙之港铁相识篇」上架。72岁嘅李龙基有心有力,4年前搵到第二春,跟36岁嘅Chris Wong谱出「爷孙恋」后跟妻子分开,虽然基哥年纪较Chris大36年,但两人有影皆双黐到实,行埋以嚟冇分开过,基哥仲话两人喺性生活上完全冇代沟,呢方面自己喺实际行动上见真章,绝对有料到,实牙实齿「坚嘢嚟」咁话,知嘞知嘞,更冧猪猪话「老婆」平时喺各方面都照顾得佢好好。
放电「肉」照任睇
呀准李太自称喺美国长大,去过荷兰及日本求学,亦是业馀飞机师、艺术家,平时除咗做跟得「夫人」外,仲会教小朋友写书法及绘画!而记者从Chris社交网站可见,有唔少抛眉弄眼,张嘴翘臀,低胸性感,系咁放电嘅「肉」照,丰乳加强劲电力,难怪见惯世面的李龙基都被俘虏。
情人节当日的独家报道见街后,网民开po热讨:「72岁李龙基和细36岁女友…阿伯都媾到女,叫单身狗们情何以堪?」其实「阿伯都媾到女」呢句系大错特错,皆因基哥今次系俾女媾。
缘份由天注定
采访当日,《星岛头条》记者追问两人相识经过,两人兴奋地你一句我一句,原来两人10年前已认识。基哥半带笑说:「我哋喺湾仔港铁站认识㗎,当时我哋对望,缘份就系咁注定喇…」Chris和应:「系呀,嗰次我去完内地参加朋友婚礼,留港一晚翌日转机返福冈(上学),咁啱喺港铁站见到佢好面善,好似系一位我认识嘅朋友,咁当然最后系认错人啦,之后我返咗去日本,大家再冇联络喇。」基哥再接住说:「直至几个月后佢打畀我话嚟咗香港,因为感冒唔舒服,佢又人生路不熟,所以由我带佢去养和医院睇医生…(去医院睇感冒?)咁媾女梗系要重手啲啦…」Chris开心表示:「嗰晚佢带咗我去一间五星级酒店食饭,其实当时我唔知佢系艺人,好奇怪点解个个都识佢?咁多侍应猛问『李生今晚想食乜?』」语毕,Chris强调当日食完饭冇上房,冇下文。不过,当记者追问两人在湾仔偶遇后,为何会交换联络电话?既然之后冇联络,Chris来港时身体不适为什么会第一时间谂起搵基哥?而且基哥当年仲系已婚男喎。对此,基哥只用尴尬而不失礼貌的微笑回应,一切尽在不言中。
3年前曾经小产
基哥同Chris行埋4年多,日日都超开心,Chris会为基哥整爱心早餐,用面包夹夹出星形青提,为他拣选衣服,让他立刻回春,开心仔基哥说:「佢有佢缺点,我哋互相包容,我哋话题同兴趣都一样完全冇代沟㗎,虽然佢咁后生,但锺意听猫王(Elvis Presley)啲英文歌,又会夏天热住陪我放飞机,有边个女仔愿意咁做呀?佢又好锺意留喺屋企,佢咁后生周围去wet我就大镬,呢个缘份好似上天安排咁,而且我哋性生活都好协调,我身体都好健康…」尽管有心有力,基哥话Chris唔太喜欢细路,而且3年前曾小产过:「大吉利是有咗咪顺其自然,到时先算罗,讲真我呢个年纪所有嘢都顺其自然,勉强唔到。」
《星岛头条》APP经已推出最新版本,请立即更新,浏览更精彩内容:http://www.stheadline.com/
【延伸阅读】:
独家丨72岁李龙基今年再婚低调唔摆酒-跟细36年女友性生活好协调
李龙基嫩妻画祝枝山送陈百祥-深得圈中前辈爱锡同白姐姐出双入对
《星岛头条》APP经已推出最新版本,请立即更新,浏览更精彩内容:http://www.stheadline.com/
最新回应