古天后日志｜港股只得资金短炒 逼近阻力小心回调

6月14日，多云，间中有骤雨及狂风雷暴，两势时颇大。美国隔晚公布5月CPI，跌至4%好过预期，美股再升，道指升145点；标指升30点；纳指升111点。标指已升破4350首个阻力位，VIX持续下跌。反映市场情绪仍然相当乐观，贪婪指数升至80极度贪婪水平，慎防AI股嘅拥挤交易热潮一过，美股出现回调。今晚香港凌晨时间联储局议息，市场估计6月维持利率不变，今晚美股走势要视乎鲍爷会后声明，会唔会向未来息口走势透过睇法，若然佢大老爷放鹰，坚持今年唔会减息，小心美股借势回吐。

今次CPI一如预期回落至4%，估计6月前CPI喺高基数下仍会有较大幅回落，但7月至9月将步入放缓期，好大机会在靠近3%后开始横行，由于核心CPI已横行并回升，小心CPI喺8月至9月开始回升。不过过目前美股气氛乐观，受经济数据影响较少。留意美国对新屋需求正在回升，房价开始反弹，估计未来通胀难以回落至联储局目标2%。

阿爷喺第一季度大大力放水，不过出嚟效果麻麻，呢一次嘅放水，只系将全年借贷放水目标集中喺第一季完成，喺第一季尽力量，其后三季就无计可施，并有机会陥入衰退。刚公布5月份M2增速已从4月12.4%降至11.6%，社融则降至1.56万亿元，同比减少46%，但较4月多出3312亿元，反映民间借贷活动唔算活跃，有钱都无人愿意借。

今年部省市嘅城投已出现违约，中央讲到明叫地坊政府唔好出面包底，令城投企业融资出现问题，城投唔买地，内房又无能为力，变相地坊政府嘅卖地收入大减，亦开始见到部份省市政府出现财困。呢个亦系阿爷努力放水，仍未见经济活动有太大起色嘅原因。

A股嘅创业板喺快将穿底之际，市场就传出阿爷再放水嘅消息，A股喺成交回升下见反弹，港股同样反咗一段时间，但恒指已逼近250日线巨大阻力，即使有本事挑战，但喺成交欠缺底气下，未必能企稳，加上入场资金以短炒为主，无论万八或万九水平，仍未见有资金肯入场坐货，内房物管板块就系一个明显例子，日升日跌，叫人无所适从。呢一种走势，试问边有人肯同你乖乖买货坐定定，入场资金都系有食即食，走为上着。