头条戏场丨《宝惊魂》导演唔好咁黐线啦好唔好?

2023-05-05 09:00

入场前：已知片长三个钟、属超现实黑色恐怖喜剧、《祖孽》导演Ari Aster久违四年新作、加Joaquin Phoenix孭飞，咁嘅配搭当然睇咗先算。

散场后：从未睇过一套戏嘅男主角可以咁惨，成世俾老母思想控制兼情绪勒索，大个咗仲要继承老母所有负能量。一套黐孖筋嘅戏，唔系闹佢，真系一套导演捻化观众嘅戏，睇完几日先消化到，想俾导演洗脑，想好deep咁follow导演潜入恐惧黑洞，买飞啦笨。(上映中)撰文:廖思慧

佢系阿宝，因为撞车所以周身伤，其实个意外系可以避免嘅。

全片有好多阿宝回忆加幻想片段，虚实间交错，认真便输了

童年阿宝同阿妈上游轮玩，呢幕见到佢阿妈自私一面，衰老母

因为被露宿者霸咗间屋，阿宝要瞓街

因为住嘅区域有露体狂杀手，阿宝又系冇著衫所以被误会

剧情讲述单亲家庭长大嘅男人阿宝(Joaquin Phoenix饰)，为咗逃离专横恐怖阿妈嘅魔掌，一条友住喺一处光天化日下杀人都冇人理嘅罪恶城市，由一个地狱搬去另一个地狱。因为应承咗阿妈回乡探亲，更专登去睇定心理医生，讲你都唔信嘅怪事接连发生，完全破坏阿宝嘅行程，然后阿妈突然死咗，探亲变奔丧，是旦啦都系要起行。导演透过一位唔识自己解决问题的中年男人返家之旅，带观众经历一场又一场强烈冲击的痛苦体验。

绝望先最痛苦
开首已交代电影属超现实黑色恐怖喜剧，唔一定有只鬼或者连环杀人犯同你玩失惊无神恭喜你先叫恐怖，做咗咁多年人，其实精神折磨或心理恐惧仲得人惊，而呢套戏最令我心寒系绝望，「冇人帮到你㗎嘞，你死咗条心啦。」同埋有啲位真系会引到你笑，不过系苦笑，惨到呢。

阿宝撞车后，被撞佢嘅夫妇收留治疗，呢两公婆表面和善实际就毒过屎

夫妇嘅女，好憎阿宝但更憎父母，自残方法相当新颖

就系个夫妇嘅女人，你睇佢几唔正常，吓到阿宝即走

夫妇嘅男人，做医生嘅，佢身后嗰位系死里逃生嘅美军，都系唔正常嘅

导演你落地狱
片长达179 分钟，其实体感唔止呢个数。电影评价超两极，锺意嘅好锺意，唔锺意嘅会嬲自己浪费179分钟时间，我就抱住睇吓导演可以有几癫嘅心态，唔算难捱。其实个脑要几咁黐线先会建构一个充满恶意又冇好人嘅世界?想挑战自己嘅可一试，唔好有任何预期，放松心情，跟住个黐线导演带你游地狱，最后你会发现导演唔止玩阿宝，仲玩鬼埋观众。