独家丨龚嘉欣称有判断力唔信「新欢」系媾女王 33岁有拖拍好正常默认恋情

2023-02-16 07:00

龚嘉欣早前带埋密友出席好姊妹陈凯琳（Grace）新年饭局，因Grace上载饭局片到社交网而误泄嘉欣「新欢」原来是日籍甜品师松冈哲也。为怕恋情见光死，嘉欣雷劈都唔认拍紧拖。不过唔认还唔认，对于「新欢」被踩系「蒲精」及「媾女王」，嘉欣就非常肉紧为呢位「了解中」的朋友护航：「咁大个人，认识朋友有判断及分析力，我只相信自己嘅感觉。」采访：方骞平摄影：谭志光化妆：Henry Li 发型：Sue Cheung 服装 : Marimekko 场地：Studio Meta

龚嘉欣自言日日都过得好开心，咁先唔会浪费人生。

明显系一对。

龚嘉欣于TVB新剧《新四十二章》中黐须演出，获网民大赞她造型可爱，对此，她开心说：「最初黐须都觉得丑样㗎，唔系个个女仔接受有须，嗰段时间黐到皮肤敏感，块面起晒红点。」唔止咁，嘉欣拍煞科打戏时仲受咗伤：「对打期间听到鼻梁位啪啪两声，踎低已经系咁流鼻血，心谂死喇，唔知会唔会毁容呢？第一时间叫大家唔好惊住，畀块镜我照吓先，因为要赶埋尾，我拍埋第二朝先有时间睇医生，拍呢个剧大家都辛苦了。」

龚嘉欣喺新剧《新四十二章》中黐须演出，破格造型获网民大赞可爱。

龚嘉欣近年主演嘅剧集好有突破性。

搵有承担结婚对象

除咗龚嘉欣，「少妇联盟」好姊妹沈卓盈、陈凯琳和谭凯琪个个「升呢」人妻及人母，而且个个嫁得好，相反嘉欣打到伤痕累累，问到男友可有叫她叠埋心水做少奶奶？她即连声否认绯闻，猛耍手拧头说：「唔系唔系…」仲解释：「我觉得自己30几岁呢个年纪，对感情好认真，希望搵到结婚对象，尤其身边朋友经已建立家庭及有小朋友，喺佢哋身上睇到照顾小朋友唔容易，好多嘢要有打算，所以谂另一半除咗睇夹唔夹，最重要目标系咪一致？都要有个长远了解，唔系咁简单，𠵱家都系了解中。既然有咁多人祝福我，我都觉得开心及接受，系好事嚟嘅，但对我嚟讲，去到结婚一刻先会同大家分享喜悦，focus返工作上，因为近年作品咁有发挥，演戏系我第一份工作，𠵱家仲Keep住团火…」她又指对方系圈外人，唔想讲太多佢嘅嘢，包括点样认识。

龚嘉欣抱住陈凯琳孻仔爱不释手，恨做妈妈样出晒嚟。

除咗龚嘉欣，「少妇联盟」的沈卓盈、陈凯琳和谭凯琪已「升呢」人妻及人母。

细细粒嘅龚嘉欣笑容甜美，仲有啲身材。

3年前，嘉欣喺台庆颁奖礼凭《杀手》夺大马视后及TVB「最受欢迎电视女角色」。

龚嘉欣不乏追求者，四万咁口收花。

龚嘉欣每次拍剧都搏到尽，拍《杀手》时捐手烂脚。

坦言介意男友花心

嘉欣保护恋情同时仲为靓仔「新欢」护航，对于松冈哲也被起底花弗兼爱夜蒲，2018年又曾与蒋家旻行埋。她坚称只相信自己眼光：「我觉得唔止男女朋友，就算朋友之间，每日身边都充斥好多谣言及是非，同一个人相处用自己嘅感觉，去感受对方系咩人，同埋咁大个人都有分析及判断能力。」至于系咪介意另一半花心？她大笑反问：「边个会唔介意？不过我唔会追问人哋过去，哗！如果做朋友要问到咁，人哋都惊咗你啦，系咪？而且关我乜事？顾掂自己先啦，我有好多嘢要做…」

身形高大的松冈哲也初来港时做过模特儿，后来转做蛋糕师。

龚嘉欣早前带埋「新欢」出席好姊妹新年饭局时，陈凯琳公开片段时意外泄密。

从片段中见到龚嘉欣跟松冈哲也好似糖黐豆。

传两人由松冈嘅甜品学生陈凯琳撮合，但龚嘉欣就紧张地否认。

讲到感情事，嘉欣唔觉意爆多少少：「尽管觉得距离结婚仲系好远，但我唔敢写任何包单，因为每一日发生嘅事千变万化，生活及生命上有好多突如其来嘅事系预计唔到，33岁系适婚年纪有拖拍好正常，好多呢个年龄嘅女性同时拥有事业及家庭…我𠵱家每一日过得好开心，就算有唔开心嘢发生，都学习搵到开心，感恩我拥有呢个年纪嘅嘢，做人唔好太贪心样样都要有。」讲到咁白，明就明啦。