毒舌大状·专访丨栢天男澳洲成长「不幸」回忆致个性内敛 遭欺凌掟石仔哑忍瞒父母：而家面皮厚好多
2023-02-03 10:00 
由黄子华及谢君豪等人主演的《毒舌大状》上映短短12日，已冲破6000万票房，走势凌厉，创下香港史上港产片最快纪录票房。今年多部贺岁片当中，《毒舌大状》在口碑与票房两大方面均创下佳绩。
入行超过10年、模特儿出身的栢天男亦有份参与演出，今次他饰演廖子妤的入赘老公，周旋于有钱老婆廖子妤与情妇王丹妮之间，因为女儿的死，王丹妮被控虐儿，其后在黄子华的一次失误，令王丹妮被判误杀罪入狱17年，两年后出现新证据，黄子华坚持为她翻案，最后发现凶手原来是栢天男。
虽然有不少人看完电影后，觉得栢天男、廖子妤与王丹妮之间的感情线单薄，但对于栢天男而言，他坦言今次是个难忘的经历，亦会当作是一个十年的考验，鉴于过往的成长路曾有不快经历，希望能藉着每次的演出，能够有更多人了解他的故事。
【点击睇栢天男《毒舌大状》演出】：
访问在《毒舌》的谢票活动前进行，栢天男似乎很着紧外界对这部电影的评价，对于三人的感情线，他认同欠少少交代：「其实系拍咗好多，我亦做足晒功课，不过所以嘢等导演去安排，我有好多朋友睇完都打畀我，冇谂过我会接呢啲角色，我谂自己系时候要有个转变。」栢天男饰演锺京颐这个角色，全程对白不多，主要靠眼神和肢体动作去交代：「呢次都一个挑战，导演同我讲，叫我唔可以做得太多，同埋我要搵个安全岛，当佢哋揭发咗少少嘢嘅时候，要有个位去走，所以好多嘢要好轻微咁做，对我嚟讲本来讲中文系有少少障碍，但系今次系冇咗个障碍，好似仲舒服，唔使专注喺语言而系靠感觉。」他还说：「我哋喺法庭拍咗4日戏，观众席嗰啲人最初唔知道发生乜嘢事，拍咗一段日子之后，眼神开始改变，好似拆穿咗件事，知道呢个人系为咗乜嘢事，点解要做咁嘅决定，嗰阵好似有100个人用对眼喺度拆穿我，系好开心，系好特别嘅经历。」
栢天男从小在澳洲长大，爸爸是蒙古人，妈妈则是上海人，当年在新南威尔士大学修读艺术与设计，毕业后到一度到荷兰工作，2011年返港转行做模特儿再转型为演员，入行初期曾有「翻版金城武」之称，首次参演的电影是《L风暴》，到底是未有受过正统的演艺训练，难免会有碰钉的时候：「嗰阵做model，最紧要chok同型，但系而家要有原因去chok，而唔系chok住先。啱啱嚟仲有好多嘢都好模糊，为咗交屋租，好多嘢都会做，我记得啱啱入行拍嘢，试过俾导演劲闹，佢问我做乜企喺度？做乜chok到咁嘅样，驶唔驶咁？嗰阵我都唔知，平时都系做呢啲嘢，咪做住先，好似个杯，载满晒啲chok样、点着衫同企位，但原来系要倒晒佢，由头再学过，重新再装满啲新嘢，到咗而家会深好多，会装啲茶入去，睇落有啲唔同，好似俾人感觉成熟啲。」他续说：「而家我要搵啲对演艺事业有帮助嘅嘢，唔系样样都要，清楚知道自己想点行，好似以前为咗瘦乜都唔食，但系而家唔会，啱嘅时候要做啱嘅嘢，俾番少少开心自己。」
【点击睇栢天男童年照】：
栢天男自觉是一个很幸运的人，入行至今遇上不少前辈，每次合作都有不少启发，其中一个是廖启智：「拍完《L》冇机会坐底倾，最多系喺庆功宴见到倾几句，直到拍《P风暴》，佢问我拍成点，我真心同佢讲觉得自己做得唔好，佢就话OK喇，咁即系承认自己有进步空间，咁先有进步，之后又跟过智叔上过10堂戏，佢讲嘅嘢好似系好简单，但系谂真啲系会对你有领悟。」之后到拍《毒舌大状》，栢天男遇上Ceci老师（伍洁茵），简直好似被「点醒」，他笑说：「因为佢嘅另一半系英国华人，我就系澳洲华人，好明白我嘅心态，老师话我做角色嘅时候，系会比人哋特别多障碍，因为我有个西方谂法，又有一个唔咸唔淡嘅世界同地道嘅香港谂法，甚至仲有个华语嘅谂法，所以我做紧嘅时候，叫我要放弃某啲思想同谂法。今次演出同导演嘅谂法系有啲唔同，最初系会喊多咗，但系导演叫我再收多啲，初初都有啲疑问，就咁就得？但系导演觉得嗰刻剧本需要咁做，充份做到嗰样嘢就得，唔好加太多嘢入去。」
经过今次之后，栢天男对演戏又有一个大启发：「我学识咗点样做一个活生生嘅人，当然仲有好多学习空间，之前系单方面，成件事系2D，憎你就憎你，爱你就爱你，但系而家系爱得嚟憎你，憎得嚟系爱你，甚至乎暪得嚟又想俾人知，深咗好多，我相信以后嘅角色系会好唔同，可以大胆啲试多啲嘢，好似谢君豪咁讲，佢拍完戏就会话『搞掂，我又要揣摩新嘅角色』，好深刻，原来唔会留喺一个空间停留，要不停咁做，要搵新嘅资源投入新角色，新挑战。」
栢天男又笑言搣甩「翻版金城武」呢个名，人到40要重新开始：「我有好多计划，希望嚟紧可以做精神分裂角色或者变态杀手嘅角色，我喺澳洲长大，父母都好保护，但系偏偏有好多唔lucky嘅嘢，有啲连爸爸妈妈都唔知，我试过喺学校俾心恰，掟石仔，又有同学唔锺意我父母，另外啲家长又唔了解我，到做嘢嗰阵又试过俾人推埋一边，有好多委屈，做《逃狱兄弟》未出晒， 好想俾人了解或者间接讲番个故仔俾人知，原来我喺澳洲经历过咁多嘢，所以希望之后有一个更高嘅角色，俾我多啲机会去表达，应该可以好满足。」他还说：「以前唔系好敢同人倾偈，好惊阻住人哋做嘢，好细胆，但系而家唔会，面皮厚咗好多，我唔会怕对方，就算相处几唔舒服都有方法，只要你真诚对人，人哋一定会真诚对番你。」
摄影：蔡建新
服装提供：ZEGNA
【其他文章】：
57岁邵美琪现身聚会变「𡃁妹」卖萌 冻龄有术渗少女味Fit爆近况曝光
TVB 7大「丑女」 汤盈盈演丑上瘾扮完再扮 港姐连真人都被批样衰遭节目嫌弃
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应