独家丨52岁兰茜自认难搵对象唔强求 淡出20年冇秘嫁富商更加冇离婚
2023-02-03 07:00 
52岁兰茜淡出幕前20年，近期再度活跃，除去年参与ViuTV剧集《940920》，为曾志伟做《开心无敌奖门人》「替工」主持，兼拍了美发用品广告外，更相隔26年返娘家商台开咪，主持881节目《茜选快乐》。其实兰茜成为「失踪人口」后，坊间有不少传闻，指她重返校园，又说她已转行到古董店打工及成为书法家，甚至已秘嫁富商，但去年已离婚，当事人亲自解画，更多谢大家的祝福。采访：杜杜 摄影：朱伟彦
92年兰茜在城大修读英文系，未毕业已加入商台，之后亦效力过新城，但讲到最为人熟悉必定是玩TVB的游戏节目，其不顾形象，唔锡身表现换来不少演出机会。至06年主持TVB《游戏天王》后便淡出幕前，「我冇站在最前线啫！都有继续接MC Job，好多谢以前嘅客户，搵我写吓嘢，做啲Marketing嘅嘢，当时我好想读书，做咗10几年嘢，不停要输出，觉得自己好多不足，好想再进步，学习多啲嘢，趁唔太老不如去进修吓啦！」
读完2个硕士古董店打工
当时兰茜没有公告自己重返校园，因选读了很难考的中大人类学硕士课程，「读书呢啲嘢好自身，同埋我唔知毕唔毕到业！哈哈！咁耐冇读书都会紧张，要交功课，又要去到某个水平先至毕到业，所以我比较低调。」结果重拾书包后，确实令她眼界大开，「之前做节目讲埋啲搞笑嘢，返学真正学习点样去表达自己谂法，呢种和而不同嘅精神好好，每个人都讲自己观点又有唔同睇法，所以嗰两年学到好多嘢，读嗰科好着重跟老师去田野考察，睇到好多文化唔同嘅生活，印证返读嘅理论，系好实在同好丰富嘅旅程。」
之后兰茜愈读愈起劲，再到港大修读辅导硕士课程，期间亦开始在上环的古董店打工，「真系返朝10晚6嗰啲工，荷里活道间铺头有几十年历史，因为我对啲旧物同古董好有兴趣，我仲写信畀个老板，话想喺呢度工作，佢系美国人，佢好好仲问我『几时返得工』，我话『听日啦』，咁就开始做，喺铺头学咗好多嘢，见咗好多旧物、古董，每件都有佢故事，但做咗接近7年，老板年纪大要返美国冇再做。」
画展遇Fans有开咪冲动
虽然不少同学都认得兰茜，但她好快融入校园生活，「好似一般同学咁，好容易相处，其实我都锺意玩，同埋我哋好多小组工作，大家要好快好熟，因为要一齐交功课。」离开幕前工作的日子，兰茜完全没有开咪及演出瘾，「实在太忙，其实交功课好大压力，唔会谂其他嘢，净系谂做好份功课，仲要写毕业论文。」
不过兰茜有继续听电台节目，亦有留意娱乐圈动向，直到前年她举行个人书画展，得DJ好友Vani（云妮）帮助，邀请一班粉丝听众捧场，令她即有开咪冲动，「喺画展同佢哋再相遇，啲感觉即刻返晒嚟，好耐冇见，但唔知点解一讲起以前或者节目嘅嘢，大家冇晒隔膜，原来廿年都系一瞬间，见到佢哋做咗爸爸或者妈妈，工作上又挑战新嘅领域，好感动，就谂会唔会喺空气中同大家见面呢？！开始有呢个谂法，好多谢商台嘅Director and CEO Rita（陈静娴）同佢倾开，佢都话可以尝试。」节目名为《茜选快乐》，兰茜就解释：「去到呢个年纪，人都会有好多嘢唔开心，但系都可以选择去开心，千祈唔好畀啲嘢困住自己，唔好执着，放开时当你懂得选择，就系你快乐嘅开始。」
自言一把年纪爱情随缘
兰茜淡出后有传已秘嫁富商Johnny Cheung，去年甚至传出两人婚姻亮红灯，她无奈苦笑澄清完全冇结过婚，「大家内心太善良太好，好为我着想，于是乎话『佢应该系嫁咗人』，好多谢大家对我嘅祝福，我会继续努力，放心！」她更以简单两字来形容淡出后的感情生活，「平静，哈哈！最紧要自我精彩，自我增值及爱自己先系最重要，你有足够能量嘅爱，先可以令到身边人幸福。」
52岁的兰茜现阶段对爱情只求随缘，对另一半亦没特定要求，「你都一把年纪，好难讲出特定嘅感觉，最紧要相处到，同大家对好多嘢睇法要一致，尤其是价值观，到咁上下年纪谂啲嘢唔同以前细个啦！就算同朋友相处都要调节，但系调节系要有底线。」她承认对象难求，但没有亦冇所谓，「唔会将呢样嘢摆喺第一个重点，回归返自己，生命里面最重要系乜嘢？就系自己觉得幸福同开心，但系你唔系依赖人哋畀你嘛！」
新网站 www.stheadline.com 已推出
最新回应