独家丨王贤志否认《仔仔一堂》教坏细路参加者介意被标签「玩菊花」

2022-12-21 07:00

由王贤志(Vinci)监制及主持的同志配对真人骚：J2节目《仔仔一堂》，今个星期高潮迭起！不过，节目一直被高度争议，甚至被投诉系「鼓吹同性恋」嘅垃圾节目。明明用心制作节目，只想大众了解多啲同志处境嘅Vinci就有话要说：「呢啲嘢冇得鼓吹，小朋友上网乜都睇到啦，而且同性恋系咪坏先？」另外，人气王参加者Louis面对「玩菊花」、「菊花佬」、「死基佬」指控一直耿耿于怀，形容难听过粗口。采访：方骞平摄影：朱伟彦场地：SHÈ

王贤志制作同志配对真人骚《仔仔一堂》，系用嚟送给亡母嘅礼物。

调酒师Nelbon(左起)、模特儿加小提琴手Howard、私房菜厨师Kenny、美容发展经理Ray、Louis系科技金融合规及风险管理主任。

王贤志否认《仔仔一堂》教坏细路。

《仔仔一堂》个个都系有型猛男！

Vinci希望由10位囝囝嘅故事，帮到一啲唔敢出柜嘅同志。

J2节目《仔仔一堂》10位男同志参加者中，型男大学讲师Andrew、「嫰版王浩信」Louis、「可爱兜风耳」HoHo及「187花美男」Carson惊现四角恋，4人透过节目环节向对方真情表白，又争取相处机会，拍出唔少感动位。

Andrew(后)对高大威猛嘅花艺师Carson(后)最有好感。

Andrew(前)及Louis(后)系队中抢手货。

舞台剧演员Ho Ho对Louis一见锺情，仲仆住一齐玩滑水梯。

Vinci认为节目系从影以嚟嘅代表作，节目出街后获内地观众、网民、甚至家长、圈中人余安安等支持，成功令更多阶层观众了解同性恋，知道佢哋喺香港传统社会生活面对嘅压力，为佢哋发声。

马诗慧以家长身份现身说法讲子女出柜，相当感动。

参加者个个都表现投入。

围炉讲心事。

唔想新一代行迂回路

对于节目被指教坏细路，Vinci点都唔认同：「𠵱家啲资讯咁发达，唔会靠一个电视节目教好或者教坏小朋友，反而小朋友喺家长指引下，会得到更多解说；父母亦唔好因为子女出柜，而觉得系世界末日，因为生命系佢自己嘅！更何况同性恋系咪坏先？如果唔系坏，点可以用教坏呢个字眼？」

王贤志同伴侣Kevin系首宗艺人同性婚姻，两人2016年喺温哥华完婚。

Vinci认为重视家人关系，比性向来得更重要。

他明白部份观众反应激烈，系源于对同性恋不明白，52岁的他有感而发说：「我以前未Come out都觉得怕丑，唔想话畀人知，觉得唔见得光，好怕人哋知咗后会觉得我好差，所以我用咗好多年时间嚟建立好多嘢，譬如做司仪、做慈善、做东华主席⋯⋯等人哋嚟接受我，其实呢啲同我锺意男定女根本系无关嘅，我只希望新一代唔好好似我咁，行咁多迂回路，做乜要用咁多年，去到50岁才挺得直做人呢？其实性向系每个人嘅基本权利。」

王贤志同伴侣Kevin生活愉快。

传达尊重与包容讯息

Vinci透諣节目传达尊重及互相包容讯息，尤其跟家人嘅关系：「屋企人系最强后盾，因为返到屋企，佢哋系唔会嫌弃你，经历过妈妈离世，面对过生离死别，冇嘢紧要得过亲人，锺意男定女其实系一件好小嘅事，有个互相锺意嘅人经已系幸福事，妈妈离世时都接受埋Kevin（Vinci丈夫）。」他唔排除开第二季，亦会做囝囝经理人。

Vinci坚持性向冇影响他日常工作及做慈善。

用行为嚟标签好难听

另外，参加者之一的Louis坦言，最难听被评为「死基佬」、其中指「玩菊花」、「菊花佬」难听过粗口，他无奈道：「唔好用一个行为及身体部位嚟标签我哋，唔系个个会咁做！」Ray坚持冇误导小朋友「搞基」，Howard则最耿耿于怀，被轰凭乜代表佢哋族群发声？Howard坚持只系将10个人嘅故事投射出来，令更多人了解佢哋，让唔够胆Come out嘅人有选择权，有共鸣就唔会孤单。至于靓仔名厨Kenny反而看得开，话唔想嘥时间做无谓争拗。Nelbon笑言也会拣静音。