世界杯2022｜专家分析:阿根廷之矛 难破格仔盾
2022-12-13 08:30 
阿根廷上场击败荷兰出现唔少踢到飞沙劈石嘅镜头，当中柏利迪斯将个波劲射荷兰后备席，相信系全场最令人火都嚟埋嘅一幕。不计完场之后，球证合共畀咗十四张黄牌，阿根廷占其中八张，你就知场面有几激烈。
阿根廷已经唔系第一次踢到咁狠辣，上届美洲国家杯决赛对巴西，阿根廷连环用啲几肉酸嘅拦截中止巴西嘅进攻。当然呢种踢法唔好听嘅叫「茅」，但有时为咗胜利，几唔好睇嘅招数都要出，艾尔相信嚟紧四强都会有唔少呢类嘅拦截。
克罗地亚今届有几韧，大家都有眼睇，上场逼到巴西踢到互射十二码分胜负，即使球员质素唔够对手，但人钉人做得好，两闸将森巴军团翼锋进攻防守得无影无踪，加上门将利华高域神龙上身，巴西好难先攻得入。今届世界杯「格仔兵」只失三球，防守固若金汤。
阿根廷同克罗地亚上场都要打足百二分钟，体能回复上可能前者些微占优，毕竟平均年龄较轻。不过克罗地亚又一次做加时之鬼，应对压力经验丰富，名副其实「食盐多过你食米」，加上士气高涨，艾尔觉得阿根廷又要面临一场硬仗。
阿根廷上场都睇到另一个问题，系死球防守一般。尤其第一球畀对面嘅韦格贺斯顶入，正系「地面屠夫」利辛度马天尼斯唔够争顶。始终阿根廷球员身高唔系突出，今仗对住身形健硕嘅克罗地亚球员，前者高空波竞争力稍逊。如果克罗地亚教练达历能够针对呢个弱点部署，阿根廷会非常头痕。
阿根廷虽然有球王美斯在阵，部分中前场球员表现都抢镜，但艾尔觉得克罗地亚可以凭整体性克服不足，未必喺法定时间有胜负，乾脆要让球「+0.5/+1」下盘算啦。 艾尔
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应