世界杯2022｜专家分析:法国真系无坚不摧？

最后两场八强赛事尘埃落定，摩洛哥连杀双「牙」，C朗拿度未能「有终之美」。英格兰仅败法国，累计喺世界杯八强输咗七次，呢个纪录系众国之冠。

老实讲，论今场表现，英格兰唔值得一场败仗。不论射门次数、禁区组织、死球攻势等，英格兰绝对好过法国。当见到哈利马古尼嘅头槌「只差一点点」，艾尔不禁大嗌：「有无黑到咁呀？」不过，正如艾尔之前喺文章所讲，「三狮」最大嘅敌人始终系自己，就连畀人哋咁安心嘅哈利卡尼，第二球十二码都可以射到「全垒打」咁，球队除咗要换教练之外，心理方面更要多加培训。

法国呢场先靠曹亚文尼嘅「神来之笔」领先，下半场再靠「银河唯一」基奥特入波奠定胜局。艾尔曾经讲过，法国系「皇马2.0」，原因系全队波粒粒皆星，喺战术组织嘅比重唔多，同皇马无乜分别，即系屈个人质素。麦巴比同丹比利屈速，基奥特屈体格同射手触觉，基本上只要个波摆到两边，就点都有威胁嘅埋门机会。

讲到法国咁恐怖，系咪无嘢可破呢？艾尔觉得「高卢鸡」未到无坚不摧嘅境界，因为中后场防守唔稳阵。今场对英格兰清楚见到，乌柏美卡奴对住哈利卡尼，守得非常狼狈。

曹亚文尼喺防守上做唔到嘢，有球十二码正系佢铲跌布卡约沙卡。迪奥靴南迪斯攻强过守，无厘头撞低对手输十二码。球队本身唔擅长防守，领队迪甘斯又出名保守，即使前面入咗波，但往往喺领先紧一球后拖慢，成日被对手追番。

艾尔绝对唔质疑法国球员嘅质素能力，但始终足球系十一个人踢，唔系纯个人竞技，嚟紧对住防守反击非常厉害嘅摩洛哥，如果继续用一种咁保守嘅心态去迎战，艾尔只可以讲句：祝你好运！　—艾尔