世界杯2022｜专家分析:老黄忠睇得要睇
2022-12-12 13:45 
有人欢喜有人愁，喺八强折戟而归嘅英格兰令本港好多球迷心碎，比赛中十二码宴客嘅哈利卡尼、老臣子佐敦轩达臣等于赛后难掩失望神情。而赢波晋级嘅法国，亦有带着湿润嘅眼角，庆祝之前不忘恭贺阵中嘅老将基奥特。
喺法国论名气及天分，大家先谂到嘅一定系基利安麦巴比，而中锋基奥特从来都同「天才」呢个形容词沾唔上边。对比法国一直出产技术出众嘅前锋，基奥特算系比较异类嘅存在：唔算出色嘅盘球技巧，但护球回传技术出众；速度唔高，但善于喺对手后衞中寻找空间；体格唔算特别出众，但制空力强及顶上功夫相当出色。尤其今场喺对方包括哈利马古尼在内的两名中坚夹击下，依然屡次争顶成功，而且更于下半场顶入致胜球。不知不觉间今届已经入咗四球与美斯并列神射手次席，更超越咗亨利成为法国队史上入球最多嘅球员。
世界杯一直都系新星嘅摇篮，但系老当益壮老黄忠同样值得大家欣赏。已经出局波兰嘅施捷斯尼、葡萄牙嘅比比、继续探戈嘅美斯、同埋上文笔者爱将基奥特等等，都系睇一场少一场，大家且睇且珍惜。 -球乐
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
關鍵字
最新回应