14岁仔遭车撞飞｜利潍留医4日仍危殆 校长录音打气「叻仔顶住呀！」
2022-11-10 14:00 
「我好憎呢个司机撞到我个仔！仲要走咗唔理我个仔，我个仔太细，得14、15岁，佢（司机）好冇责任心，如果冇途人救阿仔，点算？」本周一（7日）晚在青山公路遭私家车撞飞10多米身受重创的14岁男童彭利潍，今日（10日）留院第4天，目前仍情况危殆。利潍父母心痛爱儿飞来横祸，日夜守候爱儿消息，慈母以泪洗面，即使利潍大步槛过渡过危险期，但面对漫长康复之路，父母亦不禁无言问苍天：「我哋点样帮佢呢?」
历史科全级第一 校长录音鼓励
利潍就读元朗公立中学，校方知道他遭逢不幸，已立刻启动危机应变小组，校长、同学都关心他的状况。其中校长更特别录下一段录音，让利潍父母探望他时放在他耳边作鼓励。「利潍，我系校长呀，听唔听到？校长好挂住你，你今次要叻仔啲呀！顶住呀！校长希望你快啲好返，返元中，返番学，同你见返面，你记得吗？校长希望你成为元中毕业生，将来成为一个历史学家，所以你一定要好返，顶住呀！」利潍妈妈指校内部分同学与利潍要好，学校也担心他们情绪受困扰，因而启动了危机处理。
她指利潍最初重创入院，需在腹部内以纱布棉花止血，右手骨折，今日（10日）要开刀做手术取出纱布及固定手部骨折的地方，医生向她表示，利潍意外后若不及时转送屯门医院，「唔一定救得返佢」。「佢最严重盘骨同头部，噚日探完佢，医生话佢颅压太高或血压太高，都好易导致脑干死亡，所以要颅压稳定。」
她说儿子虽非校内最尖子，但无论小学、中学均有夺奖，「佢中一、二、三都有攞奖，佢好锺意历史科，好多个学期历史科都系攞第一。佢本来明日(11日)可以上台攞奖，因为佢历史科考到全级第一，但依家入咗医院，冇咗呢个机会啦！」利潍妈妈哽咽说道。
谈到利潍的现况，彭妈妈十分难过，「佢依家未过危险期，如果过咗危险期，就要谂点样康复，呢个系最关键，最压力大嘅问题，佢爸爸已经大年纪，如果阿仔吉人天相，渡过呢个难关，条命保咗，但以后康复条路好漫长，点帮到个仔呢？佢爸爸老啦，我哋住村屋，唔知点『嘀』佢出出入入。听骨科医生讲，阿仔成个散晒，有可能下半身瘫痪，虽然见过有人康复。如果阿仔有幸保住条命，将来面对好多嘢，佢手部神经受损，可能会冇力，将来搵食都系一个问题，唔知点生存？做阿妈点帮佢呢，唔知乜嘢方向！」
利潍是两老的独子，早已退休的利潍爸爸与前妻则育有一子，妈妈是家庭主妇，原本打算外出工作帮补生计，但现在利潍突然出事，「我依家全部计划乱晒！我唔知点安排生活！阿仔康复路要洗几多钱，点样帮到佢呢?」她想着面对将来的困境，不禁悲从中来饮泣起来。
这宗意外发生于7日晚上9时许，14岁利潍晚饭后出外，沿青山公路灰沙围散步，岂料突遭一辆私家车撞飞10数米。利潍身体多处骨折、头部重创昏迷送院抢救，至今情况危殆，警方其后拘捕车主，但肇事司机仍然在逃。
《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ
最新回应