古天后日志｜美股继续探底 港股结算前转仓等下月陪跌

9月27日，多云，间中有一两阵骤雨，日间短暂时间有阳光。美股仍然下跌，标指跟道指隔晚再跌逾1%，纳指则死猫弹完再复跌，而道指已跌穿6月低位，标指跟纳指则回试6月底部，近日淡仓有回升迹象。不过喺美债息高企下，科技股及高增长股嘅估值难免受压，而8月份嘅反弹，亦只不过系熊市之中嘅反弹，并非真正转势，如今FOCM已表明为控制通胀，仍会大力加息应对，估计下月联储局再加息之前，美股仍有机会继续向下寻底，要美股见底，可能最快都要等到下个月。俗称恐慌指数嘅VIX升至32，当升穿28反映市场预期波动正在上升，系市场睇法转淡既导向指标之一。VIX守住28持续上升，美股后市仍然系淡。

虽然美股今轮跌势略为收敛，不过喺过去十个星期，美股录得超过600亿美元资金净流出，而美元基金相返录得轻微资金净流入，反映市场倾向持有现金，喺环球股市偏弱情况下，cash is king就系硬道理。而目前唔少基金经理管理嘅基金，现金水平高达6.1%，系呢21年以嚟最高。

市场忧虑经济衰退，油价近日急，已跌穿80美元水平，油价自失守92美元之前横行区底部，就呈现一浪低于一浪嘅跌势，油价下一个支持区，系68至75美元，睇下油价会否喺悲观情绪下，继续向下寻找支持。虽然油价回落，但对欧洲高企嘅通胀毫无帮助，主要系美汇指数持续向上，升抵115水平并未见颢著回落，睇嚟会喺高位横行整固，欧元已跌穿1算，为20年以嚟低位。而英国更提出自杀式减税方案，更令英镑一泻如注，英镑跌至37年以嚟新低，睇嚟为免英镑继续下堕，英伦银行喺下个月逼不得已都要加息1%。全球息率向上，令借贷成本增加，资金流向美元偿还美债，就连美股呢个美元资产区亦要下跌，其他股市面对资金流出，所承受嘅压力更大。

人民币唔觉唔觉累计都跌咗超过一成，过去多年中国受惠欧美资金流入，内地企业已习惯长期有平钱可借，未能一如以往以新债冚旧债，内地唔少企业已陷入债务危机。喺人民币走弱下，内地企业经营更困难，A股后市都系瓜多过菜。至于港股过两日就系期指结算，呢几日期指将会有频繁嘅转仓活动，呢几日波动难免。而由上个月底期指结算后，由20000点反覆喺9月份内跌至17700水平，淡仓已录得逾2000点利润，估计呢几日转仓，可能喺现水平附近。若然淡友仍未放手，喺现水平再转仓做10月继续做淡，再乘美股近日持续寻底之势，睇怕港股喺10月上旬持续走弱，暂时想买货都要忍一忍手，待下月再出多个底先考虑入场。