独家丨廖子妤捱足十年曾疑惑：我系咪垃圾首夺女配角望家乡买屋送父母

2022-08-15 07:00

32岁廖子妤（Fish）凭电影《梅艳芳》中「梅爱芳」一角，首夺「金像奬最佳女配角」，由家乡马来西亚来港发展10年，一心追梦做演员的Fish，试过三年冇戏开靠做模特儿撑住，用25蚊捱足3日，曾怀疑自己唔啱做演员「我系咪垃圾、废柴！？」但Fish 冇放弃，因她只识演戏，夺奖令她肯定自己冇拣错演员路，未来她希望一尝主角滋味，更想在家乡买屋，令父母安享晚年。采访：杜杜摄影：朱伟彦　发型：Zap Tang @ Toni & Guy　化妆：Melody Chiu　服装：sportmax_hk@sportmax

Fish冇电影开的日子，幸吹韩风啱晒她外形，仍有模特儿工作顶住。

Fish夺奖时相当激动，通宵庆祝后，瞓醒已是下午5点，静心回想，最期待奬项能带给她更多机会，「尝试吓做主角，比较长啲嘅角色，唔系净系几场戏出一出，想有唔同方面嘅角色可以做到，譬如靓女罗！或者女性化啲角色、搞笑，我个人都几搞笑。」

Fish在电影《梅艳芳》中，饰演梅艳芳胞姐梅爱芳。

第二度获提名金像奖最佳女配角的Fish，终凭《梅艳芳》夺奖。

凭《梅艳芳》衣锦还乡

要Fish在金像奖两个提名《梅艳芳》和《智齿》拣至爱，她坦言两套电影都畀足心力演出拣唔到，但她承认对《梅艳芳》会多份感情，因电影把她带返家乡，「马来西亚冇人识我，因为我拍好多戏返唔到去，嗰边上大片多，我拍开都系敏感题材或者小本制作。」上年12月，衣锦还乡的她做访问也特别紧张，「近乡情怯，返到屋企唔想衰，喺香港早几年再惨，都唔会够胆po出嚟话冇钱，唔想衰畀家乡嘅人睇，点衰都喺香港捱咗佢。」

今届金像奖，Fish还凭电影《智齿》提名最佳女配角。

Fish衣锦还乡做访问，她承认心情特别紧张。

难捱日子，要由2012年Fish来港发展讲起，一年后有机会拍首部电影，由泰迪罗宾监制的《末日派对》，更有机会提名「金像奖最佳新演员」，可惜往后3年一直冇戏开，只靠模特儿工作支持生活，试过穷到一日食一餐，「廿蚊定廿五蚊捱咗3日，啲人完全唔信，大佬10年前喎！买公仔面有5包㗎嘛！屋企仲有啲米，又有啲蛋，就系靠呢几样嘢捱过咗。」其实当时公司每周会预支400元生活费给她，之后在人工扣，只因撞正假期她未能返公司攞支票，搞到要捱饿。

在Fish的社交网，不难发现她好多时简单食个面当一餐。

Fish来港翌年拍电影《末日派对》，更有机会提名「金像奖最佳新演员」。

被传媒冷待最难捱

经济压力并非最难捱，反而是演出机会不多，知名度低被传媒冷待，才令Fish最难受，「我拍咗一、两部戏，但系又唔系好有机会！去到公开场合影相，都会畀人叫你『快啲走』，嗰种感觉都几难捱，其实我唔介意唔影相，但公司想我影，记者又唔想影我，咪快啲影完走罗！做得唔好时又会谂，我系咪一个垃圾！一个废柴！」

3年冇戏拍，Fish终接拍要性感演出的电影《同班同学》。

2017年，Fish凭电影《骨妹》，首度提名金像奖最佳女配角。

Fish也想过放弃梦想，「但我冇第二样嘢识，放弃咗唔知做咩好，哈哈！做呢行好辛苦，做第二行又会唔辛苦咩？每次好辛苦好难捱时，会谂吓父母，谂吓喺呢个城巿比我更辛苦嘅人，依然好努力，咪捱吓罗！」Fish承认父母是精神支柱，所以领奖时喊着感谢双亲，但为了不想令身在家乡的妈妈和在印尼打工的爸爸担心，她惯了报喜不报忧，「有时都会喺IG或FB讲吓，都想有人知，有人呵吓，但又唔想阿妈担心。」

Fish跟妈咪感情要好，疫情前每有电影上映，妈咪都来港支持。

Fish坦承以往唔识感恩有对好父母，总觉得别人比自己幸福，「多谢父母提供咗一个自由环境畀我，冇限制我读书好叻，做边个行业，攞几多钱返屋企，屋企唔系好富有，但唔使等我份钱开饭，要我做啲唔喜欢嘅嘢养家，以前唔觉得系乜嘢，原来我已经拥有好好嘅条件去追梦，父母令我冇后顾之忧，就算出面失败或者跌得好痛好伤，我知道有个地方可以返去。」未来她最想好好回馈父母，「我希望将来可以喺马来西亚买到屋，爸爸唔使喺印尼做嘢，一家人一齐，有钱畀爸爸妈妈做啲开心事，譬如去旅行，开间小店经营，尽返做女嘅责任陪多啲佢哋。」