独家丨40岁李日朗合资千万搞元宇宙投资回流签约TVB又考获调香师资格

2022-07-16 07:00

40岁的李日朗（前名李逸朗，Don）到内地发展12年，身为家中长子的他，因为想孝顺父母而回归香港，继拍摄开电视剧集《黑金风暴》外，原来年初已签约TVB。重投香港电视圈的他，讲明只要有角色名及有发挥已满足，因他已考获调香师资格，更跟朋友合资8位数搞网上投资公司，有其他搵钱大计，难怪对幕前演出冇压力。采访：杜杜摄影：沈健程

Don虽然热爱投资搞生意，但他无意买砖头，认为已错过入巿最佳时机。

Don在《黑金风暴》饰演乞人憎富二代杀人犯，原来最初有两个角色任佢选择，「一系做警察，但阿峯（林峯）同唯唯（梁竞徽）两个男主角喺度，好难再发挥，另一个系杀人犯，虽然冇警察咁几十集连晒戏，我二话不说拣呢个，因反派可以多啲发挥。」而他最开心跟剧中「爸爸」吴岱融一见如故，「好多前辈有佢哋固定演法、套路，但系岱融哥冇，佢会睇你点演再配合你，佢仲nice到喺社交平台放我哋合照，仲写住『李日朗是一个很好的演员，希望可以再合作』，呢啲平时系我写㗎嘛！」

《黑金风暴》中，Don跟吴岱融演父子，还有同父异母哥哥黄浩然。

Don大赞岱融哥零架子，两人合作后还会不时聚会见面。

为照顾父母返港发展

讲到今年决定返港发展，Don解释因有感父母年纪渐老，想多些陪伴，「我走咗6年几，我系大仔得个妹妹，𠵱家妹妹同男朋友二人世界，应该返嚟关心返屋企。」于是他向TVB叩门，跟高层乐易玲见面后即签约，「虽然入行咁多年，但喺度系新鲜，我唔介意做任何角色，但求有个角色名就得。」结果公司安排机会让他跟监制打招呼，「有日全部剧集监制一齐开会，公司安排咗5分钟畀我入去打招呼，哈哈！系正嘅，就喺嗰一日我冲咗入去自我介绍后，好快收到监制电话。」结果他已参与《法言人》、《轻 · 功》、《你好，我的大夫》和《灵气逼人》4套剧演出。

Don为做孝顺仔多陪伴父母，决定将工作基地搬回香港。

Don跟模特儿女友黄静蓝感情稳定，两人有计划几年内结婚。

踏入四字头的Don，承认已学懂珍惜机会，「细个根本唔识谂，冇尊重同珍惜过，以前拍《十兄弟》试过自己黐头套，就咁攞胶水黐上去，如果观众有印象，我个头系歪，仲试过自己觉得歪，搵只手捉住演晒成场戏，咁骑呢都够胆，如果𠵱家要人哋包容，首先要过咗自己嗰关。」问到恨不恨演主角？Don想得好开，「都有导演问过我，『你系咪谂住返嚟做主角㗎？』哈哈！当然希望做主角，唔通想返嚟做配角咩，但只要角色有戏演，已经当咗系主角，就好似《黑金风暴》咁，只占一个单元，故事条线写紧我，已经系主角啦！」

Don在TVB新剧《轻 · 功》，首度跟黎耀祥合作。

Don坦承拍《十兄弟》时太年轻，未懂得珍惜机会。

挂念嫲嫲学做调香师

Don对于幕前工作睇得好开，只因他有多个瓣数搵钱。「做演艺始终系个等工开嘅行业，我唔锺意咁，想有啲主导权喺自己手。」其中一样是他已于年初取得调香师资格，全因挂念嫲嫲，「佢同我好亲，走咗17年，我谂唔起佢个样，但系佢有阵老人家加埋花露水嘅味，我好珍惜，于是趁得闲去学，冇谂过大量生产香水，谂住做订制，譬如朋友谂住结婚，佢想记住呢件事，我就帮佢做支香水。」不过他暂时未接生意，希望做调配做够九百小时才开始，但暂时只做了二百多小时。

年初，Don开心取得调香师资格证明。

Don调配香水过程不停失败，试过调出霉味香水笑餐食。

另外，Don还跟几位朋友合资8位数，在尖沙咀开设网上投资公司，最初源于他对这类新闻觉得好奇，于是就跟搞金融和投资的朋友了解，由于大家想法一致，半年前决定合作搞公司。早前已举办了首个座谈会，希望先教识有意投资者了解元宇宙，「我哋请咗专家嚟讲，首先教咗大家乜嘢系元宇宙，点样入场，再根据自己嘅智慧同埋经验一步步投资，佢可以再搵我哋公司研究有冇合作或者投资嘅计划畀佢，我哋唔希望一嚟就赚咗人哋第一次钱，跟住冇第二次，呢个唔系我同拍档嘅原则。」而现在极流行的NFT，他公司亦有提供平台同技术给一班本地艺术家，「我哋邀请佢哋嚟一齐做个艺术家社群去做NFT，我哋免费提供畀佢哋做NFT嘅技术，即系佢只要畀心机创作，其他嘢我哋会支援，希望将呢啲艺术作品，透过元宇宙或者NFT嘅世界，推广去第二度，等更多人可以认识佢哋。」