独家丨罗曼菲获火火教冧仔秘技《疯火》主持闲时爱分享性经验

2022-05-19 07:00

27岁「巨乳邓紫棋」罗曼菲（Mangie），前年凭ViuTV《鬼同你上位》夺冠弹出，旧年再靠《赌命夫妻》色诱人夫上位，最近再拍住火火同七师傅（七仙羽）主持《疯火与胶七》。虽然疫情下拍节目有难度，但一班主持合作极之愉快，闲时无聊吹水乜都倾，连性经验都拎出嚟分享。节目中负责性感担当的Mangie大爆火火对佢特别照顾，更主动教佢点冧仔，「佢教我要chur尽啲。」

「巨乳邓紫棋」Mangie，生日：1994年10月15日，三围：32E 25 35 身高：168cm，体重：48 kg。

Mangie同火火第三次合作，所以对方都会不时提点她，亦会教佢演戏技巧，「可能我同佢都合作过几次，佢都几照顾我，哈哈！我对住镜头有啲怕丑，佢就提我『你反应大少少，畀多啲反应』。」

前年Mangie凭《鬼同你上位》弹出，仲夺得比赛冠军。

去年 Mangie（右二）同火火，已经合作过《赌命夫妻》。

讨论Sica系咪处女

除了幕前教路，火火就连Mangie的感情生活亦一样关心，「出唔出得街㗎！？佢问我之前同另一半几耐曳曳一次，我就话畀佢听咁多咁多㗎咋，佢就话『咁样唔得喎！你咁嘅身材可以chur尽啲，唔好嘥咗你个身材嘛！」火火咁讲似乎系益咗Mangie男友，她都认同表示：「可能佢系男仔角度，如果运动得多，身材就会好，咁样keep住个关系会好啲啩，身材好啲，咪可以照顾我耐啲罗！」

Mangie跟火火连续3个节目合作，两人已发展到无所不谈。

Mangie同七师傅经常倾心事，连闺房秘密都会分享。

Mangie连私密事都同火火分享，睇嚟两人情非泛泛，她就解释不单止跟火火，跟七师傅都会倾，「我有问佢同husband啲嘢，我哋已经好闺密。」原来Mangie闲时会跟众主持分享性经验，「拍摄嘅过程其实真系好愉快，大家都有倾我同Sica（何洛瑶）系咪处（女）呀，又会倾吓我哋曾经有几多个性伴侣呀，七师傅自己都有分享，我哋一离开镜头，就好深入了解大家，全部人一齐倾。」问到边个最多性经验？她就搞笑话：「梗系火火最有经验，佢已经系『人爸』，年龄方面亦都最有资格。」

估唔到《疯》一班主持，节目前后都一样咁融洽。

Mangie跟《疯》一班主持，出席节目记者会。

预告出手色诱处男

曾在《鬼》节目中被七师傅话叫声好「淫」的 Mangie，样貌同身材都出众，以为她拍拖经验好丰富，她就澄清：「火火直情估我同几十个男人有关系𠻹！结果我系5只手指数得晒。」目前单身的Mangie 坦承疫情耽误埋爱情，冇机会出外识男仔，所以dry足两年，她都有请教七师傅，「佢话我会搵到个好男人，因为啲男人都锺意淫邪，哈哈！」至于对男友要求，Mangie唔使靓仔同有钱，「想搵个肥肥哋，林雪咁样，最好唔好靓仔，肥肥哋揽落去好揽啲罗！仲要幽默，同埋唔好咁蠢。（个脑似火火，外形似林雪？）系啦！同埋要细心，有冇钱都冇所谓。」

《疯火》中，Mangie着得好密实，连女仆装都唔例外。

《疯火》播出后，收视未如理想，兼有不少负评，有网民认为制作组浪费了Mangie，她就代为解画，叫观众畀多啲耐性，更预告下周她会色诱处男，「系一个年纪比较大嘅处男，我要尽量令到佢有初恋感觉，因为佢连拖都未拍过，嗰集我唔算好性感，但我会嗲佢同埋摸佢罗！」她仲会着低胸连身裙扮七师傅，为演七师傅老公的火火按摩，「因为七师傅平日好忙，我就代替佢照顾老公，我幻想自己系七师傅，帮老公按摩，真系好似骨妹上身。」