独家丨七师傅学识如何撼头埋墙最靓拍《疯火》有得着跟火火学做戏

2022-05-14 07:00

七师傅（七仙羽）跟火火继《鬼同你上位》后，再合作主持搞笑节目《疯火与胶七》。由于拍摄时正值第5波疫情高峰期，七师傅话最难忘拍MV环节，差啲要同新冠肺炎康复者「打茄轮」，吓餐死咁话。提到再合作，两人表示相当愉快，仲想下次合演爱情剧，不过七师傅强调绝对不能有「打茄轮」戏份，期间仲乱咁噏话可包住「脷袋」拍摄，见惯世面嘅火火都被佢引到狂笑。采访：杜杜摄影：沈健程

七师傅和火火再合作，两人感觉更加有默契。

火火觉得七师傅由慷慨变豪爽，「《鬼同你上位》时佢已经好唔孤寒，好锡大家，经历咗呢两年个人发咗达，更加更加豪爽，无论派利是、请食嘢，任何帮得到人嘅嘢，佢都好主动，畀我感觉系施比受，搵到几多要赠返几多，帮返几多人。」七师傅笑指为了保护火火唯有直认发咗达。

《鬼同你上位》是火火与七师傅首度合作主持的节目。

七师傅自《鬼同你上位》后爆红，拍广告拍到手软。

帮团队作法避中招

七师傅觉得同火火合作特别轻松，仲学到嘢，「佢本身系导演好有经验，随时可以纠正大家，提升我好多演艺能力，譬如佢教识我撞墙，个头要后啲咁样撞落去，个效果先靓。我觉得几好，一箭双雕，拍呢个节目顺便学埋演戏技巧。」火火在节目中有环节负责执导，他赞七师傅好搏，如入波好叻的前锋，跟她拍档可安心助攻，「佢又玩得，科班出身嘅可能会有好多质疑点解要撞墙，但你同佢讲，行埋去撞落去，佢就话咁点做呀，遇到个傻嘅，咩都肯死，又入到波喎！」

《疯火》中，七师傅跟火火演情侣，外形都几合衬。

《疯火》有很多不同环节，其中有几位主持玩游戏互斗。

拍摄撞正第5波疫情，七师傅大呻差点要跟刚染疫康复的《全民造星II》参赛者阿Lu（崔可迪）「打茄轮」，「要同佢拍MV，佢伏喺我膊头又唔戴口罩，佢仲想『打茄轮』，佢又中过我冇中，呼吸都容易传，我惊到不得了。」她又自夸台前幕后全部冇中招，全靠她每日帮大家念经作法，「我每日都念一个『灰甲』，批住个灰甲，念嗰个咒。」听见七师傅的发音，火火即笑住纠正，「盔甲呀！灰甲喺脚度㗎！唔系批灰甲，系披盔甲，哈哈！」

七师傅提及《造星II》参赛者阿Lu（崔可迪）。

赚得多的七师傅，疫情下不停派物资，做善事回馈社会。

钻研打茄轮技巧

两人觉得下次可以拍剧，火火更提议可以谈情，「中女怀春嗰啲。」但七师傅听到中女即反对，火火解释，「少女啲人闹，老女我又唔啱，过咗25岁都系中女，所以你系26岁，有种中女怀春感觉。」七师傅即说，「我冇怀春呀！」火火再解释，「含春好唔好？中女遇春好唔好？即系你遇到一个春天。」火火更赞七师傅有真性情，拍爱情嘢几好。

七师傅同火火甜蜜出席《疯火与胶七》记者会，唔知以为帮爱情剧宣传。

七师傅亦表示同火火演爱情戏唔会尴尬，但就拒绝「打茄轮」，「真系惊，好尴尬，摸吓都算，『打茄轮』条脷唔伸入去，伸入去好尴尬。」火火笑谓：「唔伸入去就唔系叫『打茄轮』啦！」七师傅话：「打到一半就算，唔好全部，就住畀人以为系，或者戴个袋去。」火火唔明追问：「点样戴个袋去『打茄轮』呀？」七师傅解释：「你唔知㗎咩，好多明星戴个脷袋拍。」火火冇咁好气，「你边度买个『茄轮』袋呀？」七师傅再解释，「人哋话可以包保鲜纸，将条脷包到实一实，跟住伸入去，Angelababy就系成日攞个袋『打茄轮』，新闻话佢次次拍亲热戏，一定搵保鲜纸包住条脷，包好多层，嘴又包一层先打。」火火听到一头雾水，唯有同七师傅讲：「你唔好太信啲新闻，𠵱家啲新闻信唔过。」