独家丨郑希怡惊觉豆豉鲮鱼炒油麦菜系极品上海封城罗霖为搵食下月再返去

2022-04-30 07:00

上海3月尾开始封城，温碧霞见势色唔对，隔离出关后马上转往三亚度假，成功喺封城前甩身；往上海做美容代言及直播嘅罗霖就惨被围困封控小区，20多日足不出户，当时解封无期，极度担心冇得食！一家3口已移居当地嘅郑希怡(Yumiko)就随遇而安，形容封城令两母女上咗好好嘅一课，仲因此发现豆豉鲮鱼炒油麦菜原来好好食。采访：方骞平

郑希怡和7岁梁浸浸喺疫情下上咗宝贵嘅一课。

罗霖近年多往内地工作，包括到上海出任美容代言人。

温碧霞在上海酒店做运动。

上海新冠肺炎疫情持续，当地分成封控区、管控区和防范区嚟管控。以封控区最严格，喺7天封闭管理期间足不出户、服务上门，直至喺「7天封闭管理+7天居家健康监测」内冇新增阳性个案就可解除封控。居于封控区嘅罗霖，因为小区不断有呈阳而增加封控期，虽然预计本月30日才解封，但她已急不及待向小区居委会申请「出门证」，预先订好机票及申请「回港易」，兼且预约做核酸及有「通行证」司机，喺4月21日晚已成功回港。

罗霖焗住买贵价物资

罗霖坦言初时都几旁徨：「只系预咗一个礼拜嘅粮食，平时喺出面食嘢，冇谂过要自己煮，住所只有两个好细嘅奶煲，所以担心到朝朝上网抢购食物，但都抢唔到，好彩妈咪联络到上海啲亲戚帮手买，另外，朋友介绍咗『跑腿』帮我买纸巾、洗衣液等，但佢收我$300(人民币)『跑腿费』，原先只系200几蚊嘅日用品涨价到500几蚊，加埋『跑腿费』共花900几蚊。」另外都有团购蔬菜及日用品，不过，就以「盲盒」形式随机取货：「但我觉得团购啲嘢唔系咁新鲜，见邻居有以物换物，好似返到原始时代咁。」

罗霖喺封控第6日收到管理员送上门嘅食物，感觉好温暖。

政府送上生油等特资，一人份都几丰富。

罗霖获亲友送嚟大量物资。

得个细奶煲用嚟煲饭。

大失预算嘅罗霖压力大增：「有抗疫疲劳，担心工作又会取消，收入大减点维持生计？不过为咗搵食，一个月后她会再返上海：「冇办法，内地工作机会一定比香港多，我只系尽力做好一位母亲嘅本份去照顾3个儿子，仲有我妈妈，有工作就好感恩，只求一个月后疫情会减退。」

罗霖有5个月没有见两个儿子及爱犬。

Yumiko邻里关系好咗

郑希怡就随遇而安：「已留喺屋企一个月，𠵱家清心寡欲，只要屋企够就ok！𠵱家每餐两三个餸，每次都食到清晒，一粒饭都唔嘥，疫情下学到所有嘢都唔可以浪费，会更加珍惜。平时好少食罐头，收到罐豆豉鲮鱼，咁啱政府派咗啲油麦菜，哈！原来豆豉鲮鱼炒油麦菜仲好食过大餐。」

郑希怡首次觉得豆豉鲮鱼油炒麦菜原来仲好食过大餐。

平日最多煮个餸。

因为煮得多，郑希怡嘅厨艺愈嚟愈好，另外每餐都食清光，一件不留。

她又用正面态度睇封城：「你可以觉得自己好惨，困住咗冇得出去，但我觉得人间有情罗。呢段时间，我同屋企人24小时相处，陪个女做功课、弹琴，佢原本好唔锺意弹琴，𠵱家早晚练琴，我觉得好有成功感。另外，同邻居关系好咗，试过因为冇生抽，用辣椒酱同邻居换物，有次冇米喺群组求救，有邻居话有多唔使换嘢，患难见真情。我见保安朝晚运送物资畀住客好攰，𠵱家我煲水饮，唔敢再叫樽装水嚟加重佢哋嘅工作负担。囡囡梁浸浸都好生性，乖咗好多，虽然只系切零食蛋糕仔贺7岁生日，但都好开心。」