独家丨黄宗泽蚝吧餐厅损失过百万 疫情下生意难做家燕姐狂呻

第5波疫情未见顶，大部份艺人冇工开，就算经营副业嘅艺人生意都失守，雪上加霜，叫苦连天。经营蚝吧餐厅已经3年嘅黄宗泽(Bosco) 索性由上月21日开始停业到3月7日，损失过百万；至于家燕妈妈艺术中心为咗学员安全都停咗实体课，不过家燕姐系良心雇主，仍全数支薪畀员工，暂时损失6位数字，家燕姐叹咗一口气说：「庆幸校址系自己物业唔使伤到入肉。」采访：方骞平 摄影：叶君海

疫情下黄宗泽都有啲损失。

家燕妈妈艺术中心培育唔少人才。

黄宗泽经营的蚝吧餐厅之前因为有员工家属中招，谂住关门7日大消毒求安心，但眼见疫情愈加严重，就算只做外卖，员工返工都有危险，临时决定再关门多一星期，他用轻松语调无奈笑住说：「裁员就冇，希望业主可减租顶住先，𠵱家都冇办法，佢哋扣吓假先，唔系点呀！不过，我啲员工真系好好呀，佢哋主动提出话『7日你(老板)嘅，7日No Pay Leave。』等个疫情缓和再睇吓有乜可以谂，暂时冇嘢谂到。」

黄宗泽落咗好多心机经营蚝吧餐厅，不时做生招牌。

黄宗泽位于尖沙咀嘅蚝吧餐厅暂时停业两周。

 

黄宗泽的餐厅主打生蚝，有唔少圈中人帮衬。

问到疫情下损失多少？Bosco坦言：「过百万(7位数字)实有啦，做生意梗系有赚有蚀，不过𠵱家疫情严重实难捱。」至于会否放弃他醉心嘅饮食生意？他有所保留：「过咗疫情再谂。」

目前正跟周秀娜拍紧寰亚剧《叠影狙击》的黄宗泽，因为疫情要停工几日。

 

全数支薪成为良心雇主

至于家燕姐省招牌嘅艺术中心暂停几个星期实体课，只供网上授课：「因为好多小朋友嚟上堂时跳吓玩吓，未必会戴好口罩，容易互相感染，停止上实体课以策安全，而且都担心啲同事返工啦，𠵱家最好留喺屋企，出入都要小心。」问到损失多少时？她即唞大气唉了几声，然后说：「全部照出粮呀…唉…都冇办法啦，损失6位数字又未到7位数嘅，好彩系自己物业冇咁伤罗…唉…不过行行都系咁冇办法喇！个个都唔想嘅，我都系以安全健康为首，希望疫情尽快过去。」

家燕姐跟学员「港孩合唱团」合唱《信望爱2022》愿香港人平稳渡过疫情。

望防疫基金照顾停业者

张美妮的老公黄国强（KK）是发型屋老板，拥有4间店铺，至4月20日前处于停业阶段的KK希望抗疫基金及业主减租可以帮补少少，但保守估计每月都要损失几十万：「𠵱家员工要停薪留职，呼吁政府喺『防疫抗疫基金条例』唔好揸得咁紧，尤其照顾埋一啲因为停业冇粮出嘅自雇员工，等佢哋有多啲保障，我有伙记停业搞到冇饭开，有啲中层员工要问我借粮嚟养妻活儿，佢哋真系好惨。」另外，Ben Sir(欧阳伟豪) 变成疫市奇葩，前年开办「维园学堂」，去年开始搞网上课程进攻「Ben Sir网上读书会」，招收小学至初中生。Ben Sir说：「呢两个月收生激增3倍以上，感受到家长恐慌及发矛，所以𠵱家开办埋《全民造师即庆故事创作演讲师》，好似第3针疫苗咁当知识补充剂。」

张美妮唔担心老公嘅发型屋生意，作为女人都系专心凑女。

张美妮老公KK嘅发型屋停业3个月，为安全故不主张员工于停业时上门帮人剪发。

张美妮有御用老公发型师。

Ben Sir搞网上课程成为疫市奇葩，他指专业人士最稳阵，就算商铺执笠，会计师嘅工作都能坚守到最后。

张伟文经理人方俊经营3间花店，疫情下花墟生意一落千丈，只能尽量散货套现养住一班旧同事。

啱啱经营美容院嘅亚视经理人林宝玉话焗住畀租，只好跟医务所合作转减肥Plan自救。

「贾名媛」邱芷微与男友投资嘅艺术学院虽然唔系表列处所，但冇人敢上堂，好彩业主都肯减两成租金，为期半年。

喺观塘工业区开外卖炖汤嘅E-kids成员林咏伦(Alan)亦已停工并指有意改做三餸饭自救。

更多第5波疫情资讯，请到以下专页浏览（按此）

立即下载｜全新《星岛头条》APP：https://bit.ly/3yLrgYZ