吴君如新片讲疫情有共鸣最怕陪囡囡去Staycation要抹厕所

2022-01-26 13:00

吴君如及梁咏琪（Gigi）日前作客TVB娱乐新闻台节目《StarTalk》，接受主播许文轩（Edmond）专访，大谈合作拍摄电影《阖家辣》感受。吴君如直言选角方面有激烈讨论，她说：「拣一个好嘅喜剧演员会令喜剧电影事半功倍，首先自己都系一张牌，觉得个剧本好贴地，所以我自己做埋演员同埋监制。而今次有个妈妈角色，觉得Gigi好适合，一来佢拍过好多喜剧，二来年纪又好啱，哈哈哈！其实第一日俾剧本Gigi，都同佢讲如果你唔想做妈妈我立即收返剧本，当饮餐茶无数。因为我以女演员，靓女角度去谂，有好多女演员未必接受有咁大个仔（吕爵安饰），我以前都因为咁样嘅关系推过好多部戏！」

君如直言被迫走喜剧演员路线，她说：「当时唔够同期演员靓，我本身唔想做喜剧，我系焗住做，呢条路系好难行，攞奖又唔到你，观众觉得你冇演技，净系听到你把声，听到呢啲说话会唔开心，慢慢谂谂吓会觉得如果可以引大家笑，令到观众肯俾钱入场睇戏，呢个系一个使命，我条路系咁样行出嚟！（而家会唔会好大满足感？) 可以啦！我更加想做爱情片女主角无奈年纪已经大，不过可以拍黄昏恋！」

梁咏琪指现在已放低偶像包袱，演喜剧更加轻松。

吴君如自觉唔够靓，所以选走喜剧演员路线。

而Gigi表示拍摄喜剧需要有喜感，她说：「我觉得自己一半一半，有时需要人哋Push下，初初入行冇乜包袱，拍咗几部喜剧，但慢慢做咗歌手，可能个偶像包袱大咗，会觉得做喜剧困难，依家少咗偶像包袱，放轻松心态，又好似觉得容易咗！」

电影讲述疫情期间发生的事，二人直言拍摄时有共鸣，君如说：「我系2020年3月第一批要戴手带嘅人，当时我坐唔到飞机返香港，就系争六个钟头，就要14日隔离。疫情期间最深刻系俾个女迫去Staycation，我心谂我屋企好似仲靓过间酒店，同埋觉得乾净啲，我每次去Staycation抹厕所抹得好辛苦，住嗰两晚搞到好攰，不过佢哋好开心。其实疫情之下自己最开心嘅系一早起身见到个女用Zoom，我多咗时间见佢，可以抱下佢揽下佢，补偿以前太忙好少见佢嘅时间。」君如又说：「我呢两年仲考咗两级钢琴，本身系陪个女一齐练琴，只不过之前冇时间去考，依家有机会，仲要疫情期间唔使对住考官考试，只系拍一条一Take过嘅片就得，如果有考官我惊我会有压力，最后我紧紧合格，依家我谂住跳级！」