独家丨经理人Wing爆Win Win拒入女团 COLLAR出道歌本由CK写

2022-01-21 21:30

话题性十足的女团COLLAR，上周三（12日）正式出道，大受欢迎的同时，亦引发不少是非和争议，《头条》搵来经理人Wing（戴颖）亲自解画，除了澄清COLLAR冇时间准备赶出道之说，以及组团时遇到各种困难，又大爆《全民造星IV》总决赛第5名的Win Win（杨安妮）同第9名CK（黄斯琪）冇入COLLAR原因，Wing更透露COLLAR出道团歌原本由CK负责写。采访：杜杜摄影：沈健程、张咏森

Wing去年入职负责搞女团，她承认心情似坐过山车好有压力。

COLLAR未成军前，花姐早已讲过曾梦见公司有队8人女团好红，Wing承认管理层亦向这方向搵成员，「后期我觉得8个成员其中一个好处系唔需要有一个特别嘅C位，冇人系需要充当呢个压力嘅C位，同埋4个4个双数亦平衡啲，至于队形有啲老师话单数好睇，但𠵱家发展出好多队形，亦有其他方法可以令佢哋睇上去更加好。」

Win Win在《造星IV》总决赛得到第5名。

再搵合作机会

至于拣成员，Wing坦言当中有好多考量，不过大家最好奇一直深得导师和评判赞赏、总决赛得第5名的Win Win最终不入团，Wing就爆其实是Win Win自己拒绝，「佢自己唔系好想入，我当刻已经打晒电话问『不如你考虑吓』，但我哋尊重每个人决定，我哋唔想迫佢一定要入。」Wing对Win Win冇入团也觉可惜，「其实我哋好锺意佢，佢表演绝对有能力，但佢有佢嘅决定我哋亦都尊重，但第二方面仲可以有好多合作，我同Win Win讲将来仲有好多嘢可以一齐玩，唔一定女团先至可以发展。」

能写能唱能跳的CK，Wing认为她更适合个人发展。

而总决赛当晚获评判谢安琪大赞，最终得到第9名的CK冇加入，Wing就解释CK有在名单当中，「佢名次好好，但系我会谂合作模式，觉得佢更适合Solo，佢有佢强烈嘅风格，亦都好有才能，又识作曲，其实我哋一开始未搵到第一首团歌时，即刻问CK不如帮女团作歌，想第一首歌佢写团员更加有归属感，亦希望同多啲香港音乐人一齐行，但嗰时佢准备紧决赛，首歌未搞掂佢只畀咗啲音乐底我，首歌绝对可以发展，但系timing问题赶住要出夹唔到。不过CK咁有个性同才能嘅人，佢应该一路作曲做唱作人，宁愿女团feat.CK，件作品会更加有意义，虽然佢入团可以帮我作歌，但系我又唔会首首都用佢曲风，佢做自己歌对佢着数啲。」

Wing估唔到COLLAR出道活动惨变「时装灾难」。

外界负评，令Wing好担心新歌《Call My Name!》反应。

团员卖身10年

芯駖入团惹起不少争议，但她大赞公司同Wing够勇签她，Wing坦承是芯駖给她勇气，「佢嘅出现同表现好说服到我，点解要set死自己18至25岁先识做，佢都咁勇敢跨出呢步，我仲后生过佢点解我唔可以畀佢更加勇敢。」

对于成军半个月便出道，3月更举行首个骚，外界认为应该畀更多时间准备，Wing就认为由1月开始安排1年工作，完整性会更强，加上刚完比赛团员仍在状态，「趁佢哋状态喺度嘅时候快啲推出，未ready有未ready嘅做法，等佢哋有空间进步或者磨合相处，要透过呢啲嘢迫出嚟，我成日同佢哋讲，我哋结咗婚𠵱家慢慢谈情。」不过她承认需要更多时间跟团员相处，展望未来要在这方面下苦功，「我都了解到佢哋嘅担心，佢哋中间其实有觉得未ready，其实大家系咪好熟又唔算，大家要一齐行落去未来10年嘅路，嚟紧演唱会仲有啲大骚，佢哋心理上亦有好多担心同埋冇安全感，好期望同佢哋建立返呢part，其实就系爱，令佢哋更加有归属感，对自己队友有信心。」

概念照拍摄角度也被指抄袭，但好快有平反声音，所以Wing并不担心。

Wing强调冇再出女团打算，但《造星IV》参赛者如Yoyo（葛绰瑶）已签约做艺人。

对于外界批评声音，Wing强调会认真聆听，「我之后都有检讨，睇咗好多留言，大家都咁讲就事出必有因，我哋认为都OK嘅嘢，原来大家唔buy，我哋就会惊，我哋真系每行一步都要睇住。」讲到再组女团DOLLAR，Wing强调绝无此事，但觉好搞笑，「唔知点解会走咗呢个名出嚟，真系冇，组团所花费嘅人力物力太多。」但承认拣人时确有睇埋其他参赛者发展，「所以公司最后签咗几位女仔，加入ViuTV做艺人，佢哋未必唱跳最适合，但可以拍其他嘢。」而COLLAR出道安排，引起MIRROR粉丝不满厚此薄彼，更令花姐惨被闹，Wing都觉得好无奈，「唔好闹花姐，佢系无辜，COLLAR出道系件开心事，但系令佢受到抨击，我都好惭愧，希望件事快啲过。」