独家丨Lokman Frankie Stanley恨虎年齐出埠 MIRROR牛年出乎意料好成绩
2022-01-13 22:00 
MIRROR队长Lokman首次担正剧集《IT狗》刚推出，仲拍住兄弟Frankie（皮皮）和Stanley（大表哥）一齐，他们直言日日开心玩到癫。对于牛年MIRROR成绩咁好，Lokman用出乎意料来形容，但大表哥坦承压力也愈来愈大，最怕令镜粉们失望。展望虎年，3子除了个人心愿外，最恨MIRROR兄弟齐脚开工，当然疫情下更希望大家可以一齐出埠拍嘢，谂起都开心，难怪Lokman讲完都忍唔住话：「讲咗3年啦！」镜粉们齐齐帮手集气啦！采访：杜杜 摄影：谭壹致、叶君海 造型：PIPA Creative 发型：Denny Ku@Chic Private I Salon 化妆：Rainbow Chung、Yumi Cheung@Annie G. Chan Makeup Centre 服装：Sandro、Ports V、Rickyywong、Zegna、Giuseppe Zanotti、Off-white、Jimmy Choo
Lokman同兄弟拍剧似开Party，「平时做骚都系一个月几次，拍剧就一个礼拜见几次，同埋拍喜剧气氛好好，开亲工都系开心，Party feel多啲，虽然有时会开好早，但都会少咗『唉吔，好早呀』呢啲。」皮皮指剧本搞笑，斋睇都会笑出声，「其实个剧本上好多生活嘅元素好笑，我睇剧本都会睇到笑。」大表哥谓拍喜剧一定要玩先至会有火花，「喜剧有时就系玩紧嘅情况下，撞到啲好笑嘢出嚟。」Lokman拍住凌文龙和岑珈其就最易笑唔停，「同小龙一齐撞啲嘢出嚟，有时真系笑到肚痛，透唔到气，要讲『对唔住，畀我哋笑多10秒先』，再即刻收番。同珈其都多火花，佢又好多故事share唔会闷。」
最怕令镜粉失望
谈到去年MIRROR发展顺利，在两大颁奖礼都有好成绩，Lokman坦言有点出乎意料，「咁讲好似唔系咁好，但真系keep住有啲新冲击新火花，呢个浪冚过嚟好似好大，原来嚟紧个浪可以仲大，呢啲惊喜同冲击，呢年系充斥住呢个状态。」不过大表哥坦承成绩愈好压力愈大，「每次拎奖，好多人觉得我哋成绩好好，拎好多奖，我哋开心嘅另一面，真系多添咗好多压力，好惊会做得唔够好，会辜负咗大家嘅喜爱同期望，我哋要做好多好好嘅作品，演好啲戏，跳好啲舞，跳齐啲，唱好啲歌，去话畀大家听，唔好辜负咗大家嘅期望同喜爱。」Lokman补充，「我哋想证明我哋好热爱呢样嘢，好肯花时间同心机喺呢样嘢上一面。」
当红的同时，MIRROR成员的私生活亦成为焦点，但3子认为压力未算太大，Lokman笑说：「大家想关注我哋私生活都系人之常情。」大表哥说：「我哋都会想知荷里活明星啲私生活啦！」Lokman续说：「但有冇压力一定有嘅，行出街食餐饭都多人关注咗，不过趁呢个机会呼吁吓大家，如果想同我哋倾吓偈或者影张相，不防过嚟当面同我哋讲一声会好啲，反而压力系你唔同我哋讲，但系又投放啲能量畀我哋，会望住我哋咁，大方同我哋打声招呼会好啲。」私生活变透明早习惯，大表哥觉得要更注意言行，「出道时花姐都提醒咗我哋，睇清楚自己言行举止，好怕我哋行为会影响到其他人。」
齐脚开工难度期
讲到虎年愿望，Lokman说：「想疫情快啲完，可以除口罩去旅行，我最近好想入戏院睇戏，一路食爆谷，好耐冇试过啦！」皮皮都认同，「饮杯嘢都好呀！」至于MIRROR方面，Lokman希望今年有project一齐做，「又可以成日见，可以依靠住大家，有啲挂住嗰个力量，最好当然系旅游节目，大家一齐出街食好嘢，都讲咗3年啦！」皮皮就想新一年向演员路进发，「希望稳定返自己方向，好多fans问我『想去边个位』，其实慢慢捉到演戏都几玩喎！睇吓可唔可以试到呢个方向。对MIRROR嘅愿望好奢侈，想多啲工作一齐做！但我控制唔到啲schedule！」大表哥即话：「宝姐听到啦！」大表哥就觉得疫情下最紧要大家都健康，「经过呢两年健康最重要，至于我哋就希望做多啲唔同嘅嘢，大家满意我哋嘅作品，期望愈大都怕大家失望，希望大家努力可以做得好啲。」至于讲了多时12子齐拍剧，3子坦言有难度，Lokman说：「呢个系To Do List入面，几时Do到就未知。」大表哥说：「个剧每一个都系主线，我谂要60集嗰啲先得。」皮皮无奈又话：「啲期又唔知点样度。」
立即下载 | 全新《星岛头条》APP :https://bit.ly/3yLrgYZ
最新回应