独家丨余咏珊赞姜涛有志气走向巨星级 搞选秀Show《就是青春》搵正能量新人

姜涛喺《叱咤》夺得两个我最喜爱大奖，仲扬言要带领香港乐坛走向「亚洲第一」。曾经低估咗MIRROR威力嘅前无綫助理总经理余咏珊(Sandy)大赞姜涛好有志气，希望佢有机会做到21世纪天王！而即将为「开电视」搞歌唱选秀节目嘅Sandy坚持唔会以打低MIRROR及声梦做目标，而系发掘一班与别不同嘅新力军，跟镜仔并肩而战。采访：方骞平 摄影：沈健程

开始部署 余咏珊为《就是青春》曾静鸡鸡去咗学校，发掘一啲识唱歌嘅学生。

 

超有人气 姜涛系人气王。

 

人生污点 余咏珊曾低估MIRROR威力搞到一地玻璃碎，更形容系人生污点。

余咏珊与前星梦娱乐行政总裁老公何哲图(Herman)离开TVB后，首项工作系跟香港开电视合作，4月推出全球歌唱选秀骚《就是青春》。初步计划由30至40人开始慢慢淘汰，Sandy开出嘅选秀条件好简单，就系要有青春带出正能量，会唱歌跳舞有才华，但唔一定系靓仔、靓女：「我哋对于拣人冇乜限制，佢哋嚟到，我哋睇吓佢哋嘅状态，就算参加过几多次其他比赛都唔系问题，只要觉得适合就加以培训。」唯一她坚持唔会做男团及女团：「我睇唔到点解要咁做？一个团队仲难畀人认识啦！」

冇睇造星 余咏珊唔想受影响，所以冇留意《全民造星IV》三甲得主。

 

专心制作 余咏珊做返最耍家嘅节目制作，希望退休前同自己有个交待。

睇好姜涛做21世纪天王
Sandy发掘新血独具慧眼，除咗昔日有线新闻台主播陈贝儿、黄翠如、洪永城及李佳芯外，仲有一众《声梦》炎明熹、姚焯菲、锺柔美及詹天文等。唯独初头曾睇低MIRROR威力搞到一地玻璃碎，𠵱家就另眼相看，她赞不绝口：「我都觉得姜涛及MIRROR劲㗎！佢哋呢班乐坛新势力真系成就嚟㗎！而且佢哋好喺状态，我觉得姜涛有『亚洲第一』呢个谂法好有志气，佢唔系止系谂自己，系要香港乐坛喺亚洲攞返一席位，咁后生，有志气最好啦！只要keep到个志气及状态向前行，一路冇变初衷就会慢慢走向巨星级，希望佢有机会做到21世纪天王，(姜涛有乜要改善？)大家唔好再挑佢骨头，佢已经做得好好。其实我锺意佢哋(MIRROR)，觉得佢哋系好正面嘅后生仔，肯为个乐坛做啲嘢。」

独具慧眼 由余咏珊夫妇发掘嘅声梦女团「After Class」好受欢迎。

 

唔会挖角 余咏珊无意挖走「有线帮」艺人，指他们经已喺TVB有一定位置。

 

世纪天王 余咏珊睇好姜涛成为21世纪天王。

 

成长经历 姜涛都有压力爆煲嘅时候，余咏珊话系艺人成长必经阶段。

期待香港乐坛百花齐放
Sandy讲明唔会以打冧ViuTV造星女团、MIRROR及声梦女团「After Class」为目标：「香港咁少人唔好谂队冧人啦，最希望所有人都忽然间听返音乐，觉得香港娱乐圈好劲，打冧人冇用㗎！玩只揪永远得一队人好惨，等于80、90年代乐坛唔止有四大天王，仲有林忆莲、陈奕迅等好多人咁，乐坛先会蓬勃，香港最好多啲年轻乐手帮乐坛，大家做唔同嘅嘢可以百花齐放，香港娱乐圈先会多啲活力。」 

乐坛红人 林忆莲及王菲都系80年代乐坛红人。

 

四大天王 80年代四大天王雄霸乐坛，至今仍然好有地位。

 

紧胋民意 去年TVB劲歌颁奖礼被指自己友玩晒，余咏珊解释系按民调报告。

声梦传奇 当日两夫妇用心拣选声梦传奇学员，搵埋星梦歌手开记者会。

 

支持合作 余咏珊觉得TVB同港台合作搞《香港金曲颁奖礼》系好事，其实几年前都计划过搞四台联颁。

立即下载 | 全新《星岛头条》APP : https://bit.ly/3yLrgYZ