黄伟文晒毛毛靓褛网民盲批残忍 IG反击不妨检查是否人造皮草

2022-01-12 11:00

著名填词人黄伟文（Wyman）有几爱时装全宇宙都知，旧年年尾佢又飞咗去时尚之都巴黎睇靓衫，亦因为咁一年一度嘅商台《叱咤乐坛颁奖礼》佢都冇出席，获颁「填词人大奖」都只能拍片讲得奖感言。不过Wyman用字咁精讲嘢咁叻，得奖感言一样引起回响，在片中提议可以举办唔计MIRROR嘅颁奖典礼，但其实都只系想同大家讲：「无论日子过得几艰难，都要揸实音乐同幽默。」

Wyman已经飞咗去巴黎个几月。

MIRROR喺叱咤扫咗8个奖！

Wyman获颁「叱咤乐坛填词人大奖」拍片讲得奖感言。

不过有啲时候，幽默都化解唔到问题，Wyman都要严正反击呀！事缘前晚（10日）佢喺IG分享身穿毛毛靓褛嘅相，竟然有人唔知头唔知路就留言：「死咗好多只…」又加上个狐狸同喊嘅Emoji，仲有网民回覆：「好恐怖。」批评Wyman身上件外套用咗好多动物皮毛而制，感觉残忍。

Wyman嬲网民未check清楚就留言批评。

道歉仲唔系几够诚意。

昨晚（11日）Wyman亲自回覆呢两位网民：「一嚟就假设我杀咗几十只动物同喊之前，不如check吓系咪整毛公仔嗰啲fake fur（人造皮草）先吖，check唔到可以问吓我吖。其实望落去假成咁都要咁讲，你似乎都好锺意演呢场戏，唔好而家先嚟话『同你讲吓笑咋嘛』，你啲语气一啲都唔似讲笑㗎！」激嬲Wyman，该网民都say sorry，不过似乎冇乜诚意：「因为我觉得你唔会着假嘢，sorry law，锡晒你。」但Wyman就唔多受嘞，再回覆网民指呢啲留言可能毁坏佢名誉，而网民hea讲对唔住都令Wyman觉得不满：「我觉得正确答案应该系『咁我以后喺留言同指控其他人之前会小心查证吓先，非常抱歉』。」