独家丨芯駖爆喊 Win Win首回应寸嘴Live 「超酸」大方提旧爱Alton

ViuTV真人Show《全民造星IV》总决赛上周六完满结束，大热门19岁Marf(邱彦筒)、28岁 Gao(沈贞巧)及19岁Day(许轶)分夺冠亚季军直入女团，而其他女团名单将于1月12日公布。梗颈四的35岁芯駖(李芯駖)一提Gao即喊、分别第5及第6名的25岁Win Win(杨安妮)及25岁So Ching(苏芷晴)嘅男友都有上台一齐跳舞，而排12名的25岁超酸(陈昭煊)比赛以嚟唔算太高人气，原来佢前度系MIRROR成员Alton，两人再见亦是好朋友。采访:廖思慧、杜淑霞 摄影:叶君海
 

决赛评判谢安琪、谷德昭及30强评审导演陈咏燊均力撑Win Win及芯駖入女团。35岁的芯駖愈战愈勇，最终夺第四名。芯駖一提亚军Gao即哽咽，最后更忍唔住喊，「我哋识咗好耐，睇住佢由唔识跳舞到而家咁成功，我哋一齐经历好多嘢，好戥佢开心。」对于选择纯唱歌，芯駖明白一定唔够跳唱高分，「好想喺舞台展现唔同嘅嘢畀大家睇。」比赛完结，MIRROR的Anson Kong及Anson Lo亦有去鼓励芯駖，人缘相当唔错。

喊到眼肿肿的芯駖好戥Gao开心，更愈讲愈激动。「佢个表演齐集全港最劲嘅街舞老师，我好proud of佢，俾好多人见到香港街舞最靓一面。」 ​

陈咏燊导演投咗芯駖一票。

芯駖同Gao好老友，但玩《造星IV》咁耐都无试过合作。

MIRROR一做完访问，AK同AL见到芯駖即刻上前安慰及鼓励对方。

知自己生得唔靓
同被强推入女团的Win Win因为在IG Live一句「入唔入女团你哋决定嘅咩」被网民群起围攻乱讲嘢同丑样，当事人首回应:「系一段长嘅Live Cut落嚟，我承认啱啱识我嘅人会觉得嗰日嘅语气唔系几好，熟我嘅知我平时都系咁讲嘢。我知自己唔靓，有自知之明嘅，想大家Focus返我嘅表演，你入我IG话我丑样，唔会有任何回应。」玩烧肉Pary加Rap(Win Win表示应叫Win Win的说话)玩到上晒瘾，就算入唔到女团，以后都会多创作。同时佢又甜蜜自爆当晚负责排舞嘅系佢男友KC，记者发现KC仲有上台一齐跳。

 

决赛评判谷德昭出Po撑Win Win入女团。

Win Win(右二)有帮P1X3L排新歌《 Just Lean On Me》嘅舞。

Win Win坦言比赛项目早于半个月前已谂定，Rap词回应Haters事件只系巧合。

Win Win因为在IG Live一句「入唔入女团你哋决定嘅咩」被网民群起围攻，其实佢又无讲错喎。

访问其间，Win Win自爆决赛表演嘅舞同男朋友KC一齐排，而KC亦有上台一齐跳(左二)。

Win Win表示一着手排舞就会谂唔到嘢，好彩有男友，「劳苦功高系KC，佢系著名排舞师。」

入女团顺其自然
除咗Win Win有爱的伴舞之外，So Ching男友，MIRROR御用Dancer，即参加过《造星I》的阿Mo（李启言）亦有帮女友伴舞，「好多谢佢，自己排舞好难睇到个画面，佢帮我度会清晰啲。」她亦提到想入女团系因为想做一个自己满意嘅作品畀大家睇。而超酸得知自己第12名已好满足，更忍唔住跳咗两吓MIRROR新歌《12》嘅舞步，对于网传旧爱是MIRROR的Alton，超酸大方承认，「好多人都知，唔系一件要瞒嘅事，我同佢而家都系好朋友。」问到决赛前有冇问Alton意见?她说，「冇问佢但Rap部份有问Lokman，因为同佢一早认识。」

So Ching跟Edan及Anson Lo歌唱老师Guddy学唱歌一个月，觉得自己有好大进步。

 

So Ching当日得第6名成绩相当唔错。

So Ching多谢男友阿Mo及一班Crew帮手排舞，又牺牲圣诞节帮佢跳舞。

记者问到见到佢男友喺台上，So Ching先愕然，「哦，系呀。」再问公关，「讲得嘅咩？」最后大方回应仲多谢男友。

阿Mo系AL嘅御用班底，见到AL就见到佢。

阿MO曾经参加过《造星I》，表现点?我哋唔多事嘞。

Win Win男友KC(左一)及So Ching男友阿Mo(右一)都有帮Anson Lo跳舞

超酸表示拣跳唱《Pretty Crazy》系因为贴近自己性格，至于入女团，佢就话顺其自然。

问到前度Alton，超酸冇避忌答得大方，「以前跳舞识，系拍过拖。」睇超酸IG发现两人同朋友合照，当时系2014年。