独家丨薛家燕想请蔡卓妍同男友落场打牌林盛斌爆黎诺懿牌品唔好

2021-11-26 02:00

由薛家燕、林盛斌(Bob) 、郑衍峰、戴祖仪、吴若希主持嘅TVB游戏节目《麻雀斗室三缺一》喺下周一晚(29日)开始播出，阿Bob爆黎诺懿牌品唔好；家燕姐赞冯盈盈太「高」章法变身「站长」；而陈敏之最迷信，竟着「红底」嚟催旺自己。她笑言最想请埋蔡卓妍同「百亿麻将馆太子爷」石恒聪上节目玩吓。采访：方骞平摄影：叶君海

曾志伟获升TVB总经理后拍板制作嘅《麻雀斗室三决一》，招揽一班打广东牌雀友，边玩游戏边跟艺人嘉宾过招，薛家燕、林盛斌话游戏好刺激，大家要喺座位转移、打透明麻雀、抽上、下家牌等游戏中食到糊，唔系咁容易。

打牌似经历人生起伏

阿Bob赞张頴康够机警又好运赢到4千几蚊奖金暂时领先；至于黎诺懿手气较差打到发脾气，阿Bob说：「听啲高手话，笑住打麻雀啲牌会愈摸愈靓；诺懿成晚都面黑黑，就算叫糊都食唔出，所以佢好无奈话『好似经历人生起伏咁。』」家燕姐建议阿Bob搵埋石恒聪跟阿Sa一齐落场。

任姐醒家燕姐二百蚊

家燕姐较少打牌：「最难忘细个时同任姐(任剑辉)拍戏，任姐怕我会成日眨眼阻佢收工去打牌，于是叫我埋去话畀200蚊我买嘢食，当年200蚊系巨额，我即时吓到瞪大对眼，咁就顺利拍完喇！」阿Bob记得小时候跟同学打牌时夹埋细佬出千：「细佬睇晒3家牌之后坐喺我隔离，然后伸手喺我大髀度打手势，但好快被揭穿咗。」