独家丨直击煞科戏现场 姚焯菲锺柔美攰到瞓 炎明熹Keep住笑坚捱得

本周日炎明熹（Gigi）抱病出席event时，喺台上脚软跌倒爆喊，事后解释因为感冒未清，加上之前一晚瞓得唔好，而非休息时间唔够。由《声梦传奇》入行短短4个月嘅Gigi好受广告客户及「Gi炎粉」(fans昵称)欢迎，面对海量工作已变身「小铁人」。之前Gigi拍摄新剧《青春本我》煞科戏，由朝早5点开工，再赶场直踩去演出，拍剧镜头以外不时笑笑口，人仔细细经已相当专业，好捱得！采访：方骞平 摄影：张咏森

《声梦传奇》学员炎明熹及姚焯菲（Chantel）人气爆灯，由佢哋主演嘅青春校园剧《青春本我》亦食住个势，赶喺12月5日（周日）晚八点半启播，TVB相当重视呢个剧，加入咗重量级艺人钱嘉乐和汤盈盈、陈炜、姜皓文等客串助阵。对炎明熹嚟讲11月嘅时间表真系好紧迫，因为学校喺11月9日开始考试，同时间要为剧集埋尾，兼且要出席商演、为新歌造势及做台庆……真系少啲耐力都唔得。

锺柔美姚焯菲要「快叉」

本报记者之前深入校园外景场地，采访炎明熹拍《青春本我》煞科戏，直击呢位「小铁人」耐力有几犀利。当日所有饰演学生哥嘅演员要喺大礼堂大合跳，剧情讲一班考紧试嘅学生哥「灵魂出窍」飞咗去舞会派对，齐齐狂歌热舞。由于要争取拍摄时间，提早到朝早五点开工(锺柔美Yumi较后时间加入拍摄)，个个凌晨两、三点就要起身做准备。当日人多手脚乱，跳舞镜头又要讲求合拍性，同埋要拍唔同角度，见演员不停重覆，喺座位度起身然后再跳舞，足足拍咗几粒钟，真系拍得超辛苦，演员都拍到有啲攰，而14岁锺柔美(Yumi)系睡宝宝，打灯期间坐著「中」眼瞓，最后瞓到伏喺枱面；至于姚焯菲就挠住双手闭目小睡嚟个「快叉」。反观Gigi精力充沛，仲坐到笔直留心等嗌Roll机，见她每跳完一次就呼出一口气嚟松一松，然后整理好头发及衣服准备拍下个镜头，再摄时间猛练舞姿，而且全程都系笑笑口，好有行动力，见她拍咗几小时都冇打过一个「喊路」，之后仲要赶场去表演，16岁女经已坚捱得，而且表现得好专业！

尽量休息Keep好精神

被赞表现专业，带点童真嘅Gigi就话：「我都唔知点解会笑，我成日傻笑，可以唔使理我！不过我会尽量休息Keep好个精神，因为表演真系好重要，我好少跳舞，对我嚟讲系有难度，要自己练得好熟，唔想做得太差。」不过，对她来说最难反而边拍剧边考试，她偷笑说：「好惊温咗书变咗唔记得晒啲剧本，唔想剧本有甩漏搞到嘥大家时间，咁应该背边样先，点算好呢？通常要返到屋企先开始温书，尽量分配好啲时间罗。」至于Chantel都力赞Gigi系个好坚强嘅人，唔会显露好攰，好专业，而她会食糖嚟提神；Yumi就话会趁转景嘅时候尽量搵位休息养吓神。