独家丨陈炜被鼎爷闹会发烂渣谭俊彦玩煮食节目必拣对手

2021-11-19 02:00

李家鼎（鼎爷）与萧秀香（三姐）于TVB烹饪比赛节目《教煮争霸》中比试厨艺，第7集开始交波畀「煮得之人」陈炜及谭俊彦大斗法，两人表示会整最好食嘅嘢畀锺意嘅人食，而刚与医生男友喺大埔购入千万爱巢嘅炜哥仲自爆，男友身形经常大上大落，因为每当她开工，男友就无啖好食，成个人瘦晒。采访：方骞平摄影：叶君海

明天起《教煮争霸》的鼎爷与三姐便功成身退转做监场官，交由陈炜及谭俊彦（Shaun）用唔同食材嚟互斗，首集食材系时令靓蟹，炜哥做焗蟹盖；Shaun拆肉做蟹饼，加入配菜及酱汁。

一开工男友就会瘦
Shaun坦言做比赛节目会有压力，最怕失礼人：「炜哥好犀利，佢会写定啲步骤，而我只系负责炒煮，由我间餐厅职员帮手写定张猫纸，咁我会易啲handle。坦白讲，如果唔系炜哥我唔会参与，比赛拣对手好重要，只得炜哥我先至输得心服口服，由于大家都识得煮餸，咁我会学到好多嘢。」炜哥则笑说：「佢煮乜，我会避一避佢，咁先有反差！」对于有机会被鼎爷当众指正错处，炜哥大笑说：「我会发烂渣会喊！不过听真说话都好，可以有改进。」Shaun加句：「我喊都好叻！」两人坦言会煮最好食嘅嘢畀锺意嘅人食，唔好食自己啃晒佢。炜哥风骚说：「我会摆好多心机落去，谂尽方法煮佢(即男友)锺意嘅嘢，好似设计芝士焗龙虾伊面、龙虾汤同龙虾粥等，所以佢(男友)唔敢弹唔好食，弹咗一世都冇得食！但每当我忙开工，佢都会由肥变瘦。」