独家丨AL自评扮女人「好丑样」 首做男一系咁露肉益「神徒」

Anson Lo（AL）在首部电影《假冒女团》中有突破性新尝试，除有不少动作场面，更要男扮女装，拍档Heidi（李静仪）和Alina（李炘颐）对AL的女装扮相有高度评价，反而当事人就唔多接受。另外，两女角更讲到AL有更衣室换衫戏，肯定有露肉镜头，绝对是「神徒」福利位，AL听完扭晒计：「你哋讲到好似真系见过晒我全相咁！」「神徒」们，睇到全相两字，系咪即刻心心眼先！撰文：杜杜 摄影：叶君海、沈健程  形象：PIPA Creative(AL) 发型：Denny Ku@CHIC private i(AL)、Calvin Tsoi@HAiR(Heidi)、@Terrence_chann(Alina) 化妆：Rainbow Chung@Annie G.Chan makeup centre(AL)、Kayte Fung(Heidi)、 Make up:@Cyruslee1018(Alina) 服装：Stella McCartney(AL)、@balmain@alexandermcqueen@balenciaga(Alina)

《假冒》是Alina的处女作，她坦言拍摄前好紧张，「收到call会有『讲笑嘛』呢个感觉，永远觉得自己未准备好。身边人包括队友畀咗好大强心针我，令到我个恐惧症尽量少发作。」第一次拍戏便担正男一，AL直言唔敢挑战新人奖，氹到观众开心最紧要，「我最大亦系唯一期望，系大家睇完套戏好开心，会同我哋一齐喺戏院里面笑。」另外，AL都想畀大家睇到佢更多可能性，对于挑战电影新人奖？AL坦言:「实在太遥远，边有资格，都好难㗎！大家锺意套戏，入场睇我已经好开心，有冇奖完全唔系重点。」


一世难得经验

AL觉得人生第一次最特别是可以扮女仔，「人生里面都未试过着咁多女仔嘅造型，有时形象师都会借啲女装但系oversize嘅衫畀我哋MIRROR着，但真正着一条裙、高踭鞋，呢一世都未试过，一世可能得一次嘅经验。」问到自评女装扮相，AL就跟角色「雷紫荆」一样，极难接受，「零分呀！哈哈！呢个系好丑样嘅女人，我呢个男扮女装唔系sell靓，系sell勇敢唔惊畀人笑。」


不过Heidi和Alina似乎相当受落AL扮女装，Heidi更指，「我畀90分啦！佢入面有个造型好正，我哋女仔都未必敢着嘅裙，佢都选择着，再加埋个装同发型，我觉得佢啲fans都会锺意，因为系从来唔会见过佢呢一面，系十分搞笑。」AL就补充：「系个好性感嘅女性造型，（露腹肌？）唔关腹肌事嘅。」至于Alina就畀足100分，因胜在够自然，「你唔会觉得佢特别核突，好自然。」

拍档大饱眼福

讲到难忘剧情，Heidi先透露有场跟AL在更衣室的戏份，AL直言：「更衣室梗系我想更衣啦！」Heidi再讲自己装到啲嘢，「AL好惊畀人知，上前捉住我，但好搞笑，拍时佢好紧张，跟住我嗌话好痛呀！佢以为我做紧反应，演紧戏。」AL即自首，「因为我太大力，嗰吓我真系好着急。」

至于Alina的深刻戏份亦一样关AL事，「嗰场我发现佢原来系男仔嚟，几得意几好玩。」Heidi插嘴，「都大饱眼福㗎！」问到是否劲过更衣室嗰场？AL即扭计投诉：「你哋讲到好似真系见过晒我全相咁！」Alina补充：「我哋做演员要有少少幻想，但系睇到上半身嘅。」而AL最深刻是尾场的大型跳舞比赛，「嗰个系好女团feel嘅舞，同埋都拍咗好耐，因为要就唔同镜头同角度，有种迷你演唱会形式，有啲似拍MV，几有型。」