独家丨刘颖镟着超贴小背心打到跪地 2021版罗拉 唐诗咏睇好快上位

曾志伟总经理接管TVB其中一个任务，就要将电视台年青化，因此，新生代艺人最有优势。24岁刘颖镟（Tiffany）拥有34.5D、25、35完美Body，最重要唔止睇得，仲非常打得。日前她跟唐诗咏为TVB新剧《隐形战队》拍外景，两人要合力制服女疑犯，着住露脐小背心加贴身长裤的Tiffany身手敏捷，连诗咏都激赞：「以后着泳衣、动作镜头交晒畀佢啦！」采访：方骞平 摄影：叶君海

文伟鸿监制嘅新剧《隐形战队》令刘颖镟有好大发挥机会，当日Tiffany跟军装Madam唐诗咏开早班喺尖沙咀闹市拍外景，剧情讲两人夹手夹脚用武力制服一名精神有问题嘅持刀女疑犯。有胸有腰又有脚嘅Tiffany大骚真人版芭比身形，完全唔使P图，25寸腰加44寸长腿，货真价实，加埋腹肌及手臂线条，行出嚟唔打得都相当睇得。

拍动作戏劲度十足

当日Tiffany要勇救跟女疑犯打到瞓咗落地嘅唐诗咏，拍该场动作戏有啲难度，武指要Tiffany冲前，再单膝跪地跣住去女疑犯身边，然后箍实她纠缠，再出力将她掟走。埋位前Tiffany先拉筋，戴上护膝及试位，见她霸气地大叫一声后，就咬紧牙关冲住跣过去，劲度十足，可惜唔啱位，又箍得唔够实，甚至因为眨咗眼要重新来过，NG 30多次，拍到唐诗咏要拎返把遮唔好晒亲，期间监制不停鼓励她：「几好㗎嘞！做个100分嘅！」拍到全身出晒汗嘅Tiffany坐喺地下垂头丧气，拍到有啲乱，要饮啖水定吓惊及搓吓膝头，文伟鸿见状，知佢已尽晒全力满意收货。相对地，唐诗咏嘅动作镜头简单得多，惟一畀两名特技演员托住踢腿，Tiffany从旁打气说：「You can do it.」

宁做打女唔行性感

Tiffany拍呢套剧要着泳装又要打，佢承认拍动作戏有压力，至于性感系剧情所需，唐诗咏大笑说：「以后着泳装及动作戏交晒畀佢，自从佢做咗Gym变得好firm，系健康性感，同选美时好唔同。」Tiffany就话宁愿做打女都唔做性感女神，唐诗咏就睇好Tiffany会愈做愈好更会上到位：「继惠英红后TVB好耐冇一位动作女演员，嚟紧TVB所有动作戏直头要搵佢，讲真好少女演员咁快拍到打戏，以后我拍揸枪戏做『枪神』，摆吓pose就得喇！(唔怕畀佢抢晒镜头咩？)梗要畀佢啦！𠵱家我拍唔到动作戏啦。」