独家丨《造星IV》Yoyo传媒主播出身　异性缘旺一问感情即落闸

《全民造星IV》87号葛绰瑶（Yoyo）虽然败给11号锺君珩（Dru）跌入复活区，不过连花姐都话宁愿放弃MIRROR签她，加上劲得男工作人员欢心，就知她必定被救。其实Yoyo是传媒主播出身，习惯面对镜头，仲有颇多舞台演出经验，又有8级芭蕾舞底子。追问劲有异性缘的Yoyo有冇男朋友？她就拒绝回应，咦，好有条件食呢行饭喎！撰文：杜杜、秦咏姿 摄影：叶君海、沈健程

22岁Yoyo自小已热爱唱歌跳舞，小学及中学都是合唱团成员，又学过声乐及有8级芭蕾舞实力，但考过演艺学院戏剧系失败的她，一直冇自信，今次在朋友鼓励下毅然参赛，「我相信参加咗人生会好唔同，所以畀个机会自己试吓，可惜同朋友一齐参加，佢哋入唔到围。」


望有更多女fans

参赛前Yoyo曾在传媒机构出任主播，她坦承对参赛有一定帮助，「虽然我讲嘢唔系好叻，同埋冇乜自信，但起码对住镜头我唔会太惊。」但她觉得最大优势不是传媒工作经验，反而是软实力的笑容，「优胜可能系同参赛者相处，佢哋话我系『笑容担当』，我又唔觉嘅，纯粹本身锺意笑，同埋笑系掩饰我嘅尴尬。」

对于甜笑除了打动对手，更冧尽一众男工作人员，Yoyo就否认：「冇咁样觉得，联络我哋都系女工作人员，可能我对佢哋（男工作人员）有礼貌。」不过她都承认做艺人异性缘旺都重要，「不过我都希望多啲女仔锺意，吸引到女仔锺意仲难。」追问Yoyo的感情状况，她即时落闸拒绝回应，更向工作人员求救。


预变「喊包」惹负评

Yoyo坦承早已有心理准备面对负评，「好定坏都要接受，可能畀到一个咁样嘅感觉人哋，先会咁样讲你，所以都有改善空间。」她预告节目中的「喊包」表现可能会惹来负评，「我系比较眼浅嘅人，通常唔系唔开心喊，系听人哋嘅分享，人哋讲自己经历，我好容易触动到，同埋啲热血情况，我又会忍唔住喊，呢样嘢系要改善，唔想个个镜头都喺度喊，会有啲烦，我知道佢哋（节目组）一定会咁样剪落去。」参加过《再见一次》等多个舞台剧演出的Yoyo，最希望未来可以演戏、综艺及唱歌各方面都有演出机会。