独家│Retroll搞YT频道以「试当真」为目标 Jerry激赞Tyson Yoshi

近年香港人听多咗广东歌，亦愈来愈多人接受到唔同曲风嘅音乐，令好多独立歌手都有出头天，Retroll除咗玩音乐，其实仲有好多搞作，梁继文（继文）同潘俊维（Jerry）接受《头条娱乐》访问就透露未来想搞YouTube频道作多元化发展。撰文:秦咏姿 摄影:叶君海


搞YouTube频道维持曝光率

呢个世代唔再需要依靠大公司先有得发围，以YouTube频道「试当真」 为例，靠创意于网络世界突围，开台一年订阅人数33万，日前更于九展开《试当真一周年现场版》，评价超好。原来Retroll都有意搞YouTube频道帮助维持曝光率，Jerry表示：「举例咁讲，当我哋想追上『试当真』一半。因为佢哋不论YouTube频道定系音乐制作都好成功，我哋唔系想做『试当真』，但想做类似嘅形式。」

Retroll为咗瞓身搞YouTube频道，喺观塘租埋地方搞工作室，买晒器材做准备。本身做开Dancer嘅继文同Jerry坦言就算张学友开200场巡回Show搵佢哋跳舞，都未必会做，因为想专心Retroll嘅业务。至于拍片题材，初步构思都系以搞笑贴地为主，另外仲希望为Retroll嘅音乐作品拍多啲MV。

Jerry：我好敬佩Tyson Yoshi

近年好多独立歌手冒起，好似行Hip Hop路线嘅Tyson Yoshi，以自己制作走上叱咤拉阔舞台。亦都证明咗而家主流同非主流嘅界线细咗，乐迷接受程度高咗，Jerry都话以Tyson Yoshi为目标：「我好敬佩Tyson Yoshi，佢系独立音乐人玩Hip Hop、R&B，由台湾红返香港，自己做埋制作，主流都要认同佢喎！佢就系我最想做嘅目标。」

继文谂定Plan B开Studio

出专辑、拍MV、搞工作室、经营YouTube频道，听落样样都系钱！如果有间大公司做后盾会唔会好啲？Jerry就唔系咁觉得：「或者佢哋仲未识玩Hip Hop同推销一个Hip Hop歌手，可能觉得香港市场唔适合，所以我先会讲笑话想做独立唱跳歌手。」

入得行做艺人就预咗有机会手停口停，问到两人有冇Set个时限畀自己，如果达唔到目标就放弃？Jerry坦白承认旧年已经历这个心理关口，但转行做过一排地产，反而令佢更坚持梦想。至于继文虽然从来冇谂过放弃，不过其实都一早谂定Plan B：「我都系想跳舞嘅，咁就算搞YouTube频道唔成功，或者做唔到星都好，我都系想继续跳舞。或者会搞个Studio之类，但唔会去做一份同而家偏差太大嘅工罗！」

家人支持与体谅

追梦除咗需要本钱，家人支持都好重要，问到家人点睇两人坚持追梦，Jerry表示：「我家人系完全冇理过，类似系我想点就点，冇话好踩我，唔畀我做，亦都冇话十分支持罗！即系觉得我有料咪有收获罗！」

对比起Jerry家人嘅放任式，继文就好得到家人的支持，他非常感谢父母：「我系独生子，照理应该养起头家，因为屋企人都有返咁上下年纪，我应该要撑起头家，其实我都有谂过正正经经打份工。」不过妈妈嘅一番话，就点醒咗佢：「佢话佢哋个年代冇咁多选择，佢梦想系想做时装设计，但当时搵唔到入行机会。而家自由社会，可以拣我锺意嘅路，锺意做就去啦！」有个明事理嘅妈妈，继文真系幸福呀！