独家丨Retroll搵Mike导拍MV 继文Jerry转行帮补做音乐
2021-10-28 18:30 
上集梁继文（继文、Kaiman Smith@Retroll）同潘俊维（Jerry、JWeezy@Retroll）分享咗参加《全民造星II》嘅感受，今次就讲吓近况，特别系所属组合Retroll的新专辑《新L品》，仲讲吓搵ViuTV综艺节目编导、「无制限OT编集団」主脑，有「格仔导演」之称的刘诺衡（Mike导）同方震扬（Rain P）拍新歌MV嘅原因。另外已移民英国、《全民造星II》30强止步嘅庄骏源（Angus、Angus the Beef@Retroll）都有分享近况。撰文:秦咏姿 摄影:叶君海
转行帮补Retroll做音乐
Jerry同继文本身都系Dancer出身，不过受疫情影响，冇得去外地做巡回演唱会。Jerry就索性转行做咗半年全职地产，仲分享畀人认出嘅经历：「啱啱返工就畀同事认到，但我即刻叫佢哋唔好张扬，因为本身好似喺幕前表演好威，坦白讲个心都有啲唔舒服。」不过佢就遇到位有心客人，鼓励佢唔好放弃梦想，令佢好感动呀！
继文开班教跳舞之馀，就继续经营个人YouTube频道，间中仲接到啲赞助，帮补到Retroll做音乐。讲到新碟《新L品》，其实系想食「Album」嘅读音，继文话：「呢一年我哋都全力制作呢只专辑，因为参加完《全民造星II》之后，Retroll都冇发表过任何作品，由于我哋学习中，所有范畴都系自己研究同制作。」
新歌搵Mike导Rain P拍MV
出新碟当然都要拍吓MV，新歌《舔深啲》找来Mike导同Rain P等人帮手拍摄。Jerry表示：「我哋唔系好擅长，觉得交畀专业人士谂会好睇啲。」两人坦言唔识Mike导，但Jerry跟Rain P于参加《造星II》之前就认识。Jerry：「因为Rain P好多年前都做过Dancer，同埋佢都系TVB出身，有时我去TVB做嘢咪识到佢罗！」
与Angus跨国度继续做音乐
Angus大约三个月前移民到英国伦敦，佢百忙中接受本报电话访问：「呢两年因为遇上疫情令人好迷惘，我觉得系时候畀自己重新搵一样新嘢，所以嚟到英国读音乐，好幸运有大学收我。」其实Angus喺Retroll制作音乐上，帮到好大忙，Retroll其他成员未来将以遥距方式同Angus继续做音乐，同时维系感情。Jerry说：「我都期望唔使靠晒Angus，我哋搞得掂。」
最新回应