独家丨曾志伟誓将TVB山头夹埋变堡垒 仔女劝唔好做 节目唔可以教坏细路

68岁的曾志伟在TVB短短8个月由副总理升至总经理，掌管晒所有节目内容，绝对是TVB史无前例升得最快的总经理。曾生坦言呢份工较想像中更加辛苦，但就愈战愈勇，除咗希望做好节目令到无綫呢只巨轮顺利向前航行外，他还有个特别任务，就系攻破TVB由来已久的「山头主义」文化，曾总经理好有信心地说：「我准备将咁多个山头变成一个大堡垒，希望将TVB全民皆兵，齐心事成。我喺呢个行业做开和事老，应该冇问题。」采访：方骞平 摄影：叶君海、谭壹致

升得快的曾志伟谦称自己唔系叻，而系王祖蓝及团队嘅功劳，强调一个人做唔到咁多嘢：「其实我哋试咗好多节目，由收视反映到观众对节目嘅喜好，《声梦传奇》、《日日妈妈声》、《好声好戏》系受欢迎，但好似《盛舞者》、《死因有可疑》冇咁多人锺意，但唔系做错咗，只不过摆唔啱时段同埋平台，应该将啲专题性节目放喺J2度，以前我认识TVB只有翡翠、明珠双辉映，𠵱家由81至85频道，加埋myTV SUPER、OTT等，将唔同嘢畀唔同嘅观众睇，因为平台分散咗收视自然较以前流失，但观众系冇少到嘅，只系去咗唔同嘅平台收睇。」

重点培训高学历年轻人
对于变身电视台高层，曾生提到最大挫败感系时间太少，工作太多，每日要同时间竞赛，而且电视台流失太多人才，入行嘅人又唔多，要花好多时间重新培育人才：「所以返到嚟要发起全民皆兵运动，由所有创作人员提供三个节目题材，围绕住香港及TVB需要乜节目、又有乜节目系最想做，最后喺80几个节目动议度拣咗三个，除咗之前制作嘅『九大综艺』外，原来年轻观众都锺意睇打麻将节目，所以嗱嗱声制作《麻将三缺一》，由艺人打广东牌。」曾生又说目前制作节目有三大宗旨，「娱乐性、正能量及正面讯息，因为我哋系免费平台，提供正确资讯好重要，而且要持平；制作啲正能量节目令观众睇得兴奋，又唔会教坏细路，朝住呢个目标制作节目就做乜都得。」另方面，又会好似新加坡政府咁，培训一啲高学历年轻人，从中再发掘宝藏。」

仔女追问几时肯享清福
除咗瞓觉，曾生坦言日日做到冇停手，亦试过做到病，所以仔女一日同佢讲足10几次，好肉赤咁追问他几时先肯享福，为乜做得咁辛苦？曾生笑说：「人最紧要交待自己，返嚟目的系为乜，我系想TVB只巨轮一路向前行，行得舒服同顺利啲，做到嘅话就系我上岸嘅时候。」当问到有否合适接班人？他坦言搞行政的未搵到，但创作上有C君同王祖蓝：「当日方逸华都系由歌星做到变老板。」除此之外，志伟坦言另一个任务系攻破TVB嘅山头主义：「我希望TVB团结成为一家人，我Day 1返嚟就做紧呢件事，𠵱家情况绝对有好转，其实唔难搞，大家嚟6楼餐厅茶座搵我倾吓偈，我会亲自冲茶请佢哋食件饼，饮杯茶食个包慢慢会沟通到。𠵱家电视行业系时候打吓仗，咁样团队会更加有士气。」

最后记者追问志伟𠵱家最想做乜？他谂咗阵说：「尽快搞得掂佢可以功成身退。」虽然他不设时间表，唔想将自己push得咁紧，但希望一年内完成，更指自己目前愈战愈勇。