张伟文入电视城录影遇上暴雨阻滞黑到银包日前不翼而飞

2021-10-09 05:30

「靓声王」张伟文(Donald) 行动不便，近年较少周围去，出入范围喺老人院附近。不过，昨天入电视城录影今晚播出嘅TVB节目《善心满载仁爱堂》时竟遇上狂风及暴雨，虽然好友方俊(Aman)仍冒住风雨车出车入，照顾周到，但风雨问题搞到交通大挤塞，录影节目出现延误。节目中张伟文只演绎一曲《每当变幻时》，却由原定一粒钟搞足大半日，真系波折重重，即使Donald有啲攰，不过做善事冇计，亦为年底举行嘅演唱会做吓热身。

不过最近Donald有啲黑仔，据好友兼监护人方俊透露，张伟文前日发现唔见咗个随身袋，袋中有银包，现金、身份证、回乡卡及信用卡等，但Donald又唔知几时及喺边度遗失，好彩现金只得几百蚊，稍后要陪他去补领。

张伟文在4年前受腰椎病影响，前后接受过两次腰椎大手术，术后颈椎退化令双脚冇力，多次跌倒撞亲搞到脑积血，2019年要入院放血续命！之后记性渐差，由于行动不便近年要入住老人院护理，政府嘅社福津贴唔够支持生活，要靠方俊每月嚟补贴，而最近Donald翻肥到200磅，状态大勇，将会喺今年12月20日、明年1月12日及14日分别喺香港文化中心、沙田大会堂及元朗剧院举行《友情有义演唱会》，从而搵啲钱傍吓身。