林作开癫价$57,000卖拳赛「汗味短裤」 计划周末搞拍卖live

林作自认系「香港抽水王」，抽水真系无极限，最近佢谂住攞「林锺一战」当日出赛时着过，浸透林作同锺培生黐埋晒一齐嘅汗水味短裤，隔住个mon都好似有味，竟敢开出癫价$57,000拍卖，信不信由你！
林作喺社交网拍片，话因为拳赛原本应有嘅100万拳酬，当中有近$57,000用咗嚟购买门票。佢话：「由于食水太深，本人决定将当晚作为英勇外卖仔所著嘅、印有我昵称 Jolam 嘅拳赛短裤拍卖，作价57,000元，以圆本人实收100万拳酬嘅心愿。买嚟著住训觉又得，搞嘢都得，得咗！」

可能大家都觉得佢疯疯癫癫，仲以为佢会被网民习惯性问候，点知只有一位网民用粗口留言，其他网友都话支持同有兴趣买。林作仲向《头条娱乐》透露有好多人出价，佢话：「有呀，甚至海外嘅人出价，有几个人都认真倾紧，但个额大，所以未有人真系落订，暂时未有人满足到我，所以打算今个周末进行一个网上拍卖，价高者我就会卖咗佢。」林作仲话条裤从来冇洗过，完全系真空处理，并继续卖裤赞裤香：「如果将来我名成利就，就更价值连成，绝对物有所值。」会唔会搭单送埋裕美私伙冇洗裤？佢话：「佢唔肯卖，我又攞唔到佢啲嘢卖，我就觉我呢条最值钱。」