独家丨陈展鹏自揭被TVB「大惩罚」真相 传续约扭计加人工变串星

44岁的陈展鹏刚同TVB续约即剧接剧，但《廉政狙撃》、《童时爱上你》及《隐形战队》三剧都系由男一变身「串星」，难免惹嚟猜测，有传他续约扭加人工，被公司大惩罚！对于传闻展鹏一于少理，日前喺翳焗兼高温天气下拍《童》剧外景，拍档系矮佢一大截又首次合作的糖妹（黄山怡），见佢弯身同糖妹做戏好投入，全无异样。展鹏自揭要帮公司做「特别任务」，以「收视福将」身份同多啲唔同演员，喺唔同类型嘅剧集合作带旺套剧。采访：方骞平 摄影：叶君海

日前，糖妹跟陈展鹏于北潭涌拍《童》剧外景，剧情讲述一直暗恋张振朗嘅糖妹好失意咁喺斜坡度踩单车，不慎炒车堕地受伤，好彩得到同样失恋嘅陈展鹏帮手，互相安慰。糖妹拍到瞓晒喺地下真嘅一样，至于身高180cm嘅展鹏为咗就住149cm嘅糖妹交戏，唔想对方视线向上咁尴尬，流晒汗都尽量踎低配合，举动获赞暖男，展鹏笑说：「咁我都有啲体温嘅！」糖妹跟展鹏初次合作好有新鲜感，还踢爆糖兄秘密：「糖兄老婆系展鹏fan club要员，我一早经已喺佢哋度听到『鹏鹏』个名，今次可以喺糖兄面前耀武扬威！」

系咁同新拍档合作

继《逆天奇案》首次同冯盈盈合作后，展鹏之后嘅对手好似高海宁、张振朗及汤洛雯等都好少合作，有啲甚至未合作过。问到系咪因为主演嘅《逆》剧大收旺场，所以多套新剧要搵他嚟「助攻」抢收视？展鹏笑住自揭传闻中「大惩罚」真相：「好多朋友都关心问过我，点解最近喺工作上有咁大调动呀？其实系同公司嘅协商，佢哋想我拍多啲唔同类型嘅剧种，同多啲新人合作，等观众冇咁闷。」在旁嘅糖妹举脚赞成：「鹏鹏向来好有观众缘，可以起到加持作用。」

同TVB关系非常好

展鹏坦言要面对不停变化嘅角色系一个大挑战：「同到咁多人合作都开心嘅，哈！感觉好似拍紧新年剧咁，有唔同嘉宾客串吓带出新鲜感，如果锺意可以搵我做埋传菜『Hello乾炒牛河一碟！』」问到可会担心被「降呢」做「串星」？展鹏重覆两次说：「唔会㗎！唔会㗎！我咁old school，因为观众睇住我成长，最重要系演出有诚意。」而糖妹就指他存在感太强，观众唔会咁睇。讲到跟TVB关系，陈展鹏即说：「非常好！续约条件非常好，TVB养活紧我屋企，我打工啫！喺呢个环境，公司好咪我好罗！」