独家丨林作投诉狂改规则唔俾戴头盔 大战前夕形容锺培生系芝娃娃

全城触目嘅《培生擂台：无敌杯We Are Champs 2021》后天(周六)举行，决战前夕，林作和教练向柏荣公开投诉锺培生不停搬龙门打茅波，就拳手装备、休息时间等问题，由口头协议到合约条文改完又改，好混乱，直认会影响到连串针对性策略，尤其突然话唔畀戴头盔好危险。对此。锺培生懒得理林作：「冇回应啦！希望大家准时入场睇比赛。」采访：方骞平 摄影：沈健程 场地：荣拳馆

打咗3年拳击嘅百亿富三代锺培生（Derek），用一百万酬金嚟迎战仅学咗半年拳击嘅林作，两人未上擂台系咁打口水战。最新有锺培生在fb出post：「林作，早晨，有冇兴趣加码？如果我K.O.咗你，扣30万出场费。如果K.O.唔到，畀多1,000,000你。」不过林作只系回佢PM详谈，大战前选择同女友裕美去游船河轻松吓。 


操肌展现老鼠仔

本周一，林作去拳馆作最后冲刺，除咗踩上擂台同向师傅对打外，仲用凶狠凌厉嘅眼神狂打沙包发泄，更喃喃自语说：「锺培生…神龙摆尾吖嘞！(锺培生拳手绰号系Almighty Dragon)」林作体重由67kg增磅到75kg，肌肉变得结实，状态大勇，展现「老鼠仔」嘅佢话，「最唔明锺培生话我搞好多小动作，意图嚟影响佢，其实我线上线下都系咁，我啤住佢都系好正常啫，唔通回避你的眼神咩！咁佢双手插袋、扁嘴之类我都可以解读佢紧张同埋恰我！」

不满系咁改赛制

锺培生话林作有好多小动作，后者就提出3点反控诉Derek三番四次改赛制：「由口头承诺到签约，喺8月30日及上周3(9月8日)仲不停喺度改紧，最重要口头话可以戴头盔，后来以画面划一为理由唔准戴；休息时间由两分钟变回一分钟；第三点要提问，究竟今次系专业赛定表演赛？又讲得唔清楚，如果系专业赛，点解就连拳套都唔符合专业赛拳手装备？而我好肯定当日签嗰份合约系业馀比赛合约，但当时冇列明细则。」教练补充说：「虽然喺奥运成人男子组比赛都弃用头盔，但儿童组、青少年及女子组都会戴，咁锺培生口中嘅林作系Girl friend(女人)，点解唔喺安全情况下畀林作打足4个回合？有头盔保护好啲，打拳击出现过头撼头，万一有意外受伤，对锺培生搞嘅event都唔好啦！另随行团队人数上都变嚟变去，𠵱家话连埋我只可有3人，感觉龙门任搬安排有少少混乱，影响到我帮林作嘅策略性安排，唔戴头盔又有另一种打法！反而佢系一张白纸，对佢冇影响，好讲佢临场发挥。」

笑Derek压力大

虽然系咁改游戏规则但林作嘻皮笑脸话唔担心：「可能佢搞拳赛好辛苦，精神压力愈嚟愈大，我见佢呢几个月嘅气场愈嚟愈差，可能因为咁要改规则嚟保护自己多啲！我有好多招数乜都搞得掂！」林作形容锺培生系只芝娃娃(狗)，他系狗主：「如果佢听话就唔使搞咁多嘢，但佢吠同咬人就要教训佢嘞！」