【独家】《七公主》演出获激赞陈晓华由喊包变享受角色

2021-09-09 23:30

陈晓华（Hera）最近在话题剧《七公主》虽然出场仅数集，饰演的「胡映雪」被强奸后更跳楼自杀，在结局周只以幻觉形式回归，仍赢尽网民赞赏。回想去年首部演出剧集《迷网》被狂踩戏屎，她坦言当时曾变喊包，但现在亦未敢太开心，不过曾搵彭秀慧等导师恶补演戏的她，愈来愈识享受投入角色。撰文：杜淑霞摄影：叶君海场地：The AIR (The ONE)

Hera获网民赞是颜值高的鬼外，又大赞她演技大跃进：「真系脱胎换骨，啲戏好自然、又到肉、表情又准，唔会夸张」、「做戏好咗」、「期待佢继续进步」、「佢同冯盈盈都好大惊喜，证明付出咗努力」。对于外界好评，她未敢自满，「好开心，自己惊喜比较多，未播出之前都有睇过嗰场法庭戏，我觉得啱啱好合格，冇大家讲得咁好，大家对我好大鼓励。法庭戏做得咁顺都要多谢监制同导演，因系连续三日去拍，情感上投入容易啲，同埋佢哋指示超清晰，好容易跟住去做。」

想挑战奸角

相对于去年《迷网》推出时的负评，今次反应天壤之别，Hera反而庆幸曾经历低潮，「我以前好怕事，就系不停有呢啲评语令我要面对同解决，而唔系避开，去行一啲安全嘅路，一定要谂用咩方法处理，究竟系睇完唔开心，定系睇完谂办法解决等大家改观，我最后选择谂办法解决，咁就令我廿几年生活模式变咗。」不过她坦言面对负评爆喊后，都要花一段时间才能积极面对，「佢哋话嘅嘢全部都要解决，譬如演技唔好、唔够自然、或者讲嘢太快。演完《七公主》我就演《异搜店》，之后休息嗰段时间，我搵咗两个老师去学戏，希望可以快啲见到成效，不过比起以前拍戏系冇咁紧张，容易投入好多。」

学戏后，Hera不讳言对演戏信心大增，现在不单识享受投入角色，更想挑戏反差极大角色，「特别系啲冇乜接触过嘅角色或者性格，我会更加享受。之前我演角色系比较斯文，女仔啲，想试吓做多啲运动、男仔头或者打女，奸角都想试吓，总之同自己反差大啲角色都想试。」