【独家】邝洁楹叮嘱戒衰多口 江嘉敏认讲嘢唔用脑得罪人

江嘉敏与邝洁楹（Judy）于热播剧《七公主》饰演同父异母姊妹，早前是非缠身的前者自认私下跟角色一样是「双面人」，「你对住监制导演、珍姐（曾励珍）、妈咪都唔同表现，有唔同嘅嘢先令个人立体，我同角色一样都讲嘢好快、好锺意讲嘢。」未料Judy即爆对方说话直率而经常惹人误会，仲叮嘱她要慎言，江嘉敏则谓正努力改善中。撰文：黎宝伦　摄影：叶君海　发型：Kenny@hair salon（邝洁楹）、NamNam Lam（江嘉敏）　化妆：Kineks Ho（邝洁楹）、NamNam Lam（江嘉敏）　服装：Breathing Store（江嘉敏）

因张家朗在东奥男子花剑个人项目夺金，让TVB剧《七公主》提早播出，剧中饰演剑击手的邝洁楹，开拍前苦练了4个月，当中一些世界级动作难以驾驭，自觉请替身「好唔型」的她一直努力练习，最终亲身上阵拍摄所有耍剑戏份。提到今次女角多，Judy直言媲美《学是学非》成员嘈到拆天，甚至遭剧组开咪叫肃静，问是非可有特别多？她说：「好开心喎，我哋围埋会倾护肤品、减肥、去水肿偏方，可以讲好耐。」

学识讲嘢前用吓脑
扮演双面人的江嘉敏多番强调，自己骗子的另一面是「纯纯兔」，而现实中，她亦曾被冯盈盈及网民暗寸「双面人」。对此，Judy笑指江嘉敏要戒衰多口，因对方太多嘢讲又唔过滤，好易讲错嘢惹人误会；自认讲嘢快的江嘉敏表示，戏剧导师认为演戏时需懂得即时反应，但叮嘱她私下要三思，故现在开口前会「用脑」，「年纪大咗冇咁好中气，都睇开咗，以前会唔开心俾人误会，而家识多咗唔同对手，佢哋会理解，自己听完啲嘢都唔会即刻回应，会沉默。前辈有教我做戏同做人，监制导演都有畀意见，而家大个女有进步，识睇场合做啱嘅嘢。」